பஞ்சகவ்யா - 7

பண்ணைக் கோழிகளுக்கு பஞ்சகவ்யா... முட்டைகள் அதிகரித்த ஆச்சர்யம்!

*சராசரி முட்டை அளவு அதிகம்.

*தீவனச்செலவு குறைவு.

*இறப்பு விகிதம் குறைவு.

*நஞ்சில்லா முட்டைகள் கிடைக்கின்றன.

பஞ்சகவ்யா உருவானவிதம், ஆரம்ப காலத்தில் அதைப் பயன்படுத்தியவர்கள், பரவலாக விவசாயிகளிடம் கொண்டு சேர்த்தவர்கள் குறித்து, கடந்த இதழ்களில் பார்த்தோம். அந்த வகையில் பயிர்களுக்கு மட்டுமல்லாமல் கோழிகளுக்கும் பஞ்சகவ்யாவைப் பயன்படுத்தி ஆய்வுசெய்து வெற்றிகண்டிருக்கிறார், கரூர் மாவட்டம், நடையனூர் கிராமத்தைச் சேர்ந்த ‘முன்னோடி இயற்கை விவசாயி’ மதியழகன். 

மரங்கள் அடர்ந்த சோலைவனம் போல் காட்சியளிக்கிறது, மதியழகனின் பண்ணை. பண்ணையின் நடுவே நீண்டு கிடக்கின்றன, கோழிகளுக்கான கொட்டகைகள். ‘கொர்க் கொர்க்’ என்று ஓயாமல் கேட்கும் கோழிகளின் சப்தத்துக்கு இடையே மதியழகனிடம் பேசினோம்.

“96-ம் வருஷத்தில் இருந்து முட்டைக்கோழிப் பண்ணைத் தொழிலைச் செய்துகிட்டிருக்கேன். 5 ஆயிரம் கோழியில் ஆரம்பிச்சது... இப்போ, 50 ஆயிரம் கோழிகள் வரை வெச்சிருக்கேன். முட்டைகளை பவுடராக்கி வெளிநாடுகளுக்கு ஏற்றுமதி செய்ற கம்பெனிக்குத்தான் முட்டைகளை அனுப்பிக்கிட்டிருந்தேன். நல்லா போயிட்டிருந்திச்சு தொழில். என்னோட முட்டைகள கொள்முதல் செய்து வந்த கம்பெனியின் சேர்மன் ஒருநாள் ரேடியோவுல பேசினார். ‘நம்ம நாட்டில் இருந்து வெளிநாடுகளுக்கு ஏற்றுமதி செய்யுற உணவுப் பொருட்களில் ரசாயன படிமங்கள் கலந்திருப்பதாக இறக்குமதியாளர்கள் சொல்றாங்க. நாம் அனுப்புற முட்டை பவுடர்ல கூட ரசாயனத்தின் தன்மை இருப்பதா தகவல் வந்திருக்கு. எனவே, ரசாயனம் இல்லாம, இயற்கை விவசாயம் மூலம் விளைஞ்ச தானியங்களைக் கொண்டு கோழித்தீவனங்களைப் பயன் படுத்தவேணும்’னு அந்த ரேடியோ செய்தியில சொன்னார். அதுலேருந்து இயற்கை விவசாயத்து மேல எனக்கொரு ஈர்ப்பு ஏற்பட்டுடுச்சு.

அந்த சமயத்துல வேலாயுதம்பாளையத்துல நடந்த இயற்கை விவசாயக் கருத்தரங்குல கலந்துக்கிட்டேன். அங்க ‘நஞ்சில்லா விவசாயம்’ பத்தி நிறைய செய்திகளை விவரிச்சாங்க. அங்கதான், முதன்முதலா, நம்மாழ்வாரையும், டாக்டர்.நடராஜனையும் சந்திச்சேன். நஞ்சில்லா விவசாயம் பத்தி ரொம்ப அழகா சொன்னார், நம்மாழ்வார். கூட்டம் முடிஞ்சதும், அவரைச்சந்திச்சு என் பிரச்னையைச் சொன்னேன். கொஞ்ச நேரம் யோசிச்சவர், ‘எனக்கு கோழிகள் குறித்து அவ்வளவா தெரியாது. நீங்க டாக்டர். நடராஜன்கிட்ட பேசுங்க. அவர் ஏற்கெனவே கால்நடைகளுக்கு பஞ்சகவ்யாவைப் பயன்படுத்திக்கிட்டு இருக்கார்’னு சொன்னார். அதைத் தொடர்ந்து, டாக்டரே எங்க பண்ணைக்கு வந்து பஞ்சகவ்யா தயாரிக்கச் சொல்லிக் கொடுத்தார். 

கோழிகளுக்கு பஞ்சகவ்யாவைக் கொடுத்துப் பார்க்கிற பரிசோதனையை ஆரம்பிச்சோம். நோய் தாக்கி இறக்கிற தருவாயில இருந்த 9 குஞ்சுகளை எடுத்து, ஒவ்வொரு குஞ்சுக்கும் 5 மில்லி பஞ்சகவ்யாவை வாயில ஊத்தினோம். 5 நாள் தொடர்ந்து கொடுத்ததுல அந்தக் குஞ்சுகள் நல்லா தேறிடுச்சு. இந்தத் தகவலை நம்மாழ்வார்கிட்ட சொன்னப்போ, ரொம்ப சந்தோஷப்பட்டார். 

திடீர்னு ஒரு நாள் பண்ணைக்கு வந்தார், நம்மாழ்வார். அவர் வந்திருந்த சமயத்துல உயிர் பிழைச்சு தேறி வந்த அந்த 9 குஞ்சுகளும் முட்டை போட ஆரம்பிச்சிருந்துச்சு. அதைப் பார்த்து ரொம்பவே சந்தோஷப்பட்டார். அப்படியே சில யோசனைகளையும் சொன்னார். ‘இந்த 9 குஞ்சுகளைக் காப்பாத்துனதை வெச்சு ஒரு முடிவுக்கு வந்துடக்கூடாது. தொடர்ந்து ஆராய்ச்சி பண்ணணும். குஞ்சுப் பருவம், முட்டையிடும் பருவத்துல இருக்கிற 500 கோழிகளைத் தனியா பிரிச்சு, தினமும் பஞ்சகவ்யா கொடுத்து பரிசோதனை செஞ்சு மாற்றங்களைக் குறிச்சு வைங்க’னு நம்மாழ்வார் சொன்னார். அது மாதிரி பரிசோதனை செய்ததுல, குஞ்சுப் பருவத்துல ஒரு குஞ்சுக்கு தினமும் ஒரு மில்லியும், முட்டையிடும்் பருவத்துல ஒரு கோழிக்கு தினமும் 3 மில்லியும் கொடுத்தாலே போதுமானதுனு ஒரு முடிவுக்கு வந்தோம். அப்படிக் கொடுத்துட்டு வந்ததுல குஞ்சுகளோட இறப்பு விகிதம் குறைஞ்சது. அதோட தரமான முட்டைகளும் கிடைக்க ஆரம்பிச்சது. 

வழக்கமா கோழிகள் 20 வாரத்துல பருவத்துக்கு வந்து 80-ம் வாரம் வரை முட்டை போடும். சராசரியா 310 முட்டைகள் கிடைச்சாலும், அதுல முழுமையடையாத சின்ன முட்டைகள் எல்லாம் போக, 260 முட்டைகள்தான் தேறும். ஆனா, பஞ்சகவ்யா கொடுக்க ஆரம்பிச்ச பிறகு, சராசரி அளவான 310 முட்டைகளுமே சரியான அளவுல தரமா இருந்தது. 

அடுத்து கம்பெனி தீவனங்களைத் தவிர்த்துட்டு... ரசாயனம் பயன்படுத்தாம விளைய வெச்ச தானியங்களை வாங்கி, நானே அடர்தீவனத்தைத் தயாரிக்க ஆரம்பிச்சேன். 1,000 கிலோ தீவனத்துக்கு 30 லிட்டர் பஞ்சகவ்யானு கலந்து காய வெச்சு இதைக் கொடுக்க ஆரம்பிச்சேன். இதைச் சாப்பிட ஆரம்பிச்ச கோழிகளுக்கு நோய் எதிர்ப்புச் சக்தி அதிகமா இருந்தது. அதனால மருத்துவச் செலவு குறைஞ்சது. இறப்பு விகிதமும் குறைஞ்சது. குறைவான தீவனச்செலவுல நஞ்சில்லாத முட்டைகள் கிடைக்க ஆரம்பிச்சது” என்ற மதியழகன் நிறைவாக, 

“நஞ்சில்லா முட்டைங்கிறது பஞ்சகவ்யாவாலதான் எனக்கு சாத்தியமாச்சு. நஞ்சில்லா முட்டைகள் உற்பத்தியாக ஆரம்பிச்ச பிறகு, எனக்கு முட்டை விற்பனையில பிரச்னை இல்லை. இருந்தாலும் நஞ்சில்லா முட்டை, நம்ம மக்களுக்கும் கிடைக்கணுங்கிற நோக்கத்துல ‘இயற்கை முட்டை’ங்கிற பெயர்ல நானே இனி விற்பனை செய்யலாம்னு இருக்கேன். அதுக்கு நிச்சயம் வரவேற்பு இருக்கும்னு நினைக்கிறேன்” என்றார். வாழ்த்துக்களைச் சொல்லி விடைபெற்றோம். 

முட்டைக் கோழிக்கு பஞ்சகவ்யா !

“முட்டைக் கோழிகளுக்குக் கொடுக்கும் பஞ்சகவ்யாவில் சில மாற்றங்களைச் செய்ய வேண்டும்” என்ற மதியழகன், தயாரிப்பு முறையைச் சொன்னார்.

“5 கிலோ சாணம், 3 லிட்டர் பசு மாட்டுச் சிறுநீர், 2 லிட்டர் பால், 2 லிட்டர் தயிர் ஆகியவற்றோடு, 2 லிட்டர் நீராகாரம் (பழைய சோற்றுத் தண்ணீர்) சேர்த்து தயாரிக்க வேண்டும். ஒரு கோழிக்கு 3 மில்லி என்ற அளவில் கொடுக்க வேண்டும்” என்றார், மதியழகன்.

பயிர்களுக்கும், கோழிப்பண்ணைக்கும்!...

பஞ்சகவ்யா தயாரிப்பு பற்றி டாக்டர்.நடராஜன் சொன்ன விஷயங்கள் இங்கே...

‘‘பயிர்களுக்குக் கொடுக்கும்போது 19 நாட்களில் பஞ்சகவ்யா தயாராகிறது. அதாவது 5 கிலோ பசுமாட்டுச் சாணத்துடன் 500 கிராம் நெய்யை கலந்து மூன்றுநாட்கள் கழித்து பால், தயிர், பசுமாட்டுச் சிறுநீர், இளநீர், கனிந்த வாழைப்பழம், 3 லிட்டர் சர்க்கரைத் தண்ணீர் ஆகியவற்றை ஊற்றிக் கலக்கிவிட்டு, அடுத்தநாள் 2 லிட்டர் தென்னங்கள்ளை பீப்பாயினுள் உள்ள கலவையில் ஊற்றி, நாளொன்றுக்கு இருவேளை 7 நாட்கள் கலக்கி விட, பஞ்சகவ்யா தயார். பயிர்களுக்கு என்றால், பத்து லிட்டர் தண்ணீருக்கு 300 மில்லி பஞ்சகவ்யா கலவையைக் கலந்து தெளிக்கலாம். இதை கறிக்கோழிகளுக்கு தலா 3 மில்லி கொடுத்துவர கோழிகளுக்கு நோய் எதிர்ப்புச் சக்தி கூடும். குறிப்பாக கறிக்கோழிகளை அதிகம் தாக்கும் கழிச்சல் நோய் தடுக்கப்படும்.’’

(தென்னங்கள் கிடைக்காதவர்கள் வேறு ஒரு எளிய வழி மூலம் கள் தயாரிக்கலாம். 2 லிட்டர் இளநீரை காற்றுப் புகாமல் பாட்டில் அல்லது கேனில் ஊற்றி மூடி வைத்து பிறகு ஒருவாரம் கழித்து திறந்து பார்த்தால் அது நொதித்து, கள்ளாக மாறியிருக்கும். அதை பஞ்சகவ்யா கரைசல் தயாரிக்க பயன்படுத்தலாம்.)

கறிக்கோழிகளுக்கு எடை கூடும்!

கறிக்கோழிகளுக்கு பஞ்சகவ்யா கொடுப்பதால் ஏற்படும் நன்மைகள் குறித்து, ஆய்வு மேற்கொண்டு வருகிறார், சென்னை எத்திராஜ் கல்லூரியின், உயிர் வேதியியல் துறை உதவிப் பேராசிரியை ஜெ.ப்ரியா. அவரிடம் பேசியபோது, “கறிக்கோழிகளுக்கு பஞ்சகவ்யா கொடுத்து ஆராய்ச்சி செய்ததில் பஞ்சகவ்யா சாப்பிடும் கோழிகளுக்கு எடை அதிகரிப்பது உறுதியாகி இருக்கிறது. ஒரு கிலோ கோழித்தீவனத்தில் 10 மில்லி பஞ்சகவ்யா கரைசலைக் கலந்து கொடுத்து வந்தால் 40-ம் நாளில் எடை போடும்போது... சராசரி எடையை விட 250 கிராம் முதல் 400 கிராம் வரை எடை அதிகரிக்கிறது. அதோடு, குஞ்சுகளின் இறப்பு விகிதமும் குறைகிறது” என்றார்.

பஞ்சகவ்யா - 6

கொத்துக் கொத்தாய் முருங்கைக்காய்கள்... பஞ்சகவ்யாவின் மகிமை!

பஞ்சகவ்யா உருவான விதம் ஆரம்பகாலத்தில் அதைப் பயன்படுத்தியவர்கள், பரவலாக விவசாயிகளிடம் கொண்டு சேர்த்தவர்கள் குறித்து கடந்த இதழ்களில் பார்த்தோம். அந்த வரிசையில் இந்த இதழில், தனது அனுபவங்களைப் பகிர்ந்து கொள்கிறார், ஈரோடு மாவட்டம், பரஞ்சேர்வழி அடுத்துள்ள நல்லூர்பாளையம் கிராமத்தைச் சேர்ந்த ‘இயற்கை ஆர்வலர்’ பார்த்திபன்.

இவருக்கு ‘பாமர தீபம்’ பார்த்திபன் என்கிற அடைமொழிப் பெயரும் உண்டு.

அவர் சொல்வதைக் கேட்போமா....

“எனக்கு நேரம் கிடைக்கிற போதெல்லாம் என்னோட அத்தை வீட்டுக்கு போய் அவங்களை பாத்துட்டு வருவேன். அப்படி ஒருமுறை போயிருந்தப்போ, முருங்கைக்காய் சாம்பார் வெச்சு மதிய சாப்பாடு கொடுத்தாங்க. அது அபாரமான ருசியா இருந்துச்சு. நிறையக் கேட்டு வாங்கிச் சாப்பிட்டேன். அப்போ, அந்த காய் எந்த ஊர் காய்னு விசாரிச்சப்போ... ‘இது சந்தையில வாங்கினது இல்லை. ஆஸ்பத்திரியில இருந்து வந்தது’னு சொன்ன அத்தை,

‘உடம்புக்கு கொஞ்சம் முடியலை. அதனால, கொடுமுடி ஆஸ்பத்திரிக்கு போனேன். அங்க ஆஸ்பத்திரி தோட்டத்துல இருந்த முருங்கை மரத்துல ஜடை ஜடையா காய் தொங்கிட்டு இருந்திச்சு. அது குறித்து டாக்டர். நடராஜன்கிட்ட கேட்டப்போ, பஞ்சகவ்யாவில் விளைஞ்ச முருங்கைக்காய்னு சொல்லி கொஞ்சம் காய் கொடுத்தார். அதுதான் இது’னு சொன்னாங்க.

அந்த முருங்கை மரத்துல ஒரு குச்சியை உடைச்சிட்டு வரணும்னு நினைச்சு... சாப்பிட்ட கையோட, ஆஸ்பத்திரிக்கு போய்ட்டேன். அங்க முருங்கை மரங்களைப் பார்த்து அசந்து போய்ட்டேன். நூத்துக்கணக்கான பச்சைப் பாம்புகள் தொங்கற மாதிரி தரைய தொடுற அளவுக்கு காய்கள் தொங்குச்சு. டாக்டர் நடராஜன்கிட்ட முருங்கை குறித்து கேட்டேன்.

அப்பதான் பஞ்சகவ்யா குறித்து டாக்டர் எனக்குச் சொன்னார். அதைத் தயாரிக்கிற முறை, பயன்படுத்துற முறை, அதோட பலன்கள் எல்லாத்தையும் விலாவாரியா பொறுமையா சொல்லிக் கொடுத்து முருங்கை விதைக் குச்சிகளையும் கொடுத்து அனுப்பினார். அந்த விதைக்குச்சிகளை நட்டு... பஞ்சகவ்யா தயாரிச்சுக் கொடுக்க ஆரம்பிச்சேன். ஒன்றரை வருஷத்துல என் வீட்டுலயும் முருங்கை காய்ச்சு குலுங்க ஆரம்பிச்சது. அப்போதான் பஞ்சகவ்யாவோட மகிமையை நான் புரிஞ்சுக்கிட்டேன்.

எனக்கு சிகரெட் பிடிக்கிற பழக்கம் உண்டு. ஒரு நாளைக்கு மூணு பாக்கெட் சிகரெட் பிடிச்சுடுவேன். அதனால, எனக்கு தொண்டையில வலி வந்து எரிச்சல் ஏற்பட்டுடுச்சு. உள்ளூர்ல பார்த்த வைத்தியத்துக்கெல்லாம் பலனில்லை. ஒரு டாக்டர் மூலமா, அடையாறு புற்றுநோய் ஆராய்ச்சி மையத்துக்குப் போனப்போ, சோதனை பண்ணிட்டு... எனக்கு உணவுப்பாதையில புற்று நோய் அறிகுறி இருக்குனு சொன்னாங்க. அதுக்கு சிகரெட் முக்கிய காரணம்னும் சொன்னாங்க. அப்போ, இருந்து சிகரெட்டை விட்டுட்டேன். தொடர்ந்து மருந்துகளை எடுக்க ஆரம்பிச்சேன். ஆனாலும் குடல் புண் முழுமையா ஆறலை.

அந்த சமயத்துலதான், கொடுமுடி டாக்டர் மூலமா, நம்மாழ்வார் அய்யா நடை பயணம் தொடங்கப் போறார்ங்கிற தகவல் கிடைச்சது. பவானி சாகர் அணையில் தொடங்கி கொடுமுடியில் முடிஞ்ச, அந்த ஒரு மாச இயற்கை விழிப்பு உணர்வு நடை பயணத்தில் நானும் கலந்துக்கிட்டேன். அப்போதான் அய்யாகிட்ட நெருங்கிப் பழகுற வாய்ப்பு கிடைச்சது. அப்போ, என்னோட புற்று நோய் பிரச்னையையும் அவர் தெரிஞ்சுக்கிட்டார்.

அவர்தான், ‘இயற்கை வாழ்வியல் முறைக்கு மாறிடுங்க, வந்த நோய்களையும் வரப்போகும் நோய்களையும் தடுக்கும் சக்தி அதுக்கு உண்டு’னு சொல்லி, திருநெல்வேலி, சிவசைலம் இயற்கை வாழ்வியல் மருத்துவமனை குறித்து சொன்னார்.

அந்த மருத்துவமனை போய் தங்கி இயற்கை வாழ்வியல் முறையில இணைஞ்சுட்டேன். படிப்படியாக, என்னோட நோய் குறையத் தொடங்கிடுச்சு. குடல் எரிச்சல் நின்னே போச்சு. அதனால, இயற்கை வாழ்வியல் மேல அதீத ஈர்ப்பு ஏற்பட்டுடுச்சு. அதனால, என்னை முழு நேர ஊழியனா இயற்கைகிட்ட ஒப்படைச்சுட்டேன். நிறைய விவசாயிகள்ட்ட பஞ்சகவ்யாவைக் கொண்டு சேர்த்திட்டிருக்கேன்.

கொடுமுடி டாக்டர், என்னை ‘பஞ்சகவ்யா பக்தர்’னுதான் கூப்பிடுறாரு. புத்தருக்கு போதி மரத்தடியில ஞானம் கிடைச்ச மாதிரி எனக்கு முருங்கை மரத்தடியில ஞானம் கிடைச்சிருக்கு. பஞ்சகவ்யாவில் விளைஞ்ச முருங்கைக்காய் ருசியாலதான் அதைத்தேடி போனேன். பஞ்சகவ்யா மூலமா நம்மாழ்வார் அய்யா அறிமுகமானார். அவர் மூலமா இயற்கை மருத்துவமனை அறிமுகம். அதுமூலமாத்தான் என் நோய் குணமாச்சு. ஆக, என் நோய் தீர காரணம் பஞ்சகவ்யாதான் “என்றபடி விடைகொடுத்தார்

தொடர்புக்கு,

பார்த்திபன்,

செல்போன்: 94433-05011.

இப்படிதான் தயாரிக்கணும் பஞ்சகவ்யா!

பஞ்சகவ்யா மூலப்பொருட்கள் மற்றும் அது தயாரிக்கும் முறைகள் குறித்து டாக்டர். நடராஜன் சொன்ன விஷயங்கள் பாடமாக இங்கே...

ஆரம்பத்தில் பசுமாட்டில் இருந்து கிடைக்கும் ஐந்து பொருட்களை மட்டும் பயன்படுத்தி தயாரிக்கப்பட்டது பஞ்சகவ்யா. தொடர்ந்து செய்யப்பட்ட பல்வேறு வயல்வெளி ஆராய்ச்சிகளின் முடிவில் இப்போது கூடுதலாக சில பொருட்களை சேர்த்துள்ளோம்.

(தென்னங்கள் கிடைக்காதவர்கள் வேறு ஒரு எளிய வழி மூலம் கள் தயாரிக்கலாம். 2 லிட்டர் இளநீரை காற்றுப் புகாமல் பாட்டில் அல்லது கேனில் ஊற்றி மூடி வைத்து பிறகு ஒருவாரம் கழித்து திறந்து பார்த்தால் அது நொதித்து, கள்ளாக மாறியிருக்கும். அதை பஞ்சகவ்யா கரைசல் தயாரிக்க பயன்படுத்தலாம்.)

முதல் நாள் செய்யவேண்டியது

5 கிலோ பசுமாட்டு சாணத்துடன் 500 கிராம் நெய்யை கலந்து நன்றாக பிசைந்து உருண்டை சேர்த்து 30-50 லிட்டர் அளவு கொண்ட பீப்பாய்க்குள் வைத்து மூடவேண்டும். தொடர்ந்து 3 நாட்கள் சாணம் நெய் கலவை பீப்பாய்க்குள் இருக்கும்.

நான்காவது நாள் மூடியை திறந்து பால், தயிர், இளநீர், பிசைந்த வாழைப்பழம், ஆகிய நான்கு பொருட்களை சாணம், நெய் கலவையினுள் சேர்த்துக் கலக்கவேண்டும்.

3 லிட்டர் தண்ணீரில் கலந்து சர்க்கரைத் தண்ணீராக மாற்றி பீப்பாய்க்குள் ஊற்றவேண்டும். நாட்டு சர்க்கரையை நேரடியாக சேர்க்கக் கூடாது. தொடர்ந்து 10வது நாள் வரை தினமும் காலை, மாலை ஆகிய இரண்டு வேளைகள் பீப்பாய்க்குள் இருக்கும் கரைசலை திறந்து கலக்கி விடவேண்டும் கலக்கிய பின் மூடிவைக்கவேண்டியது முக்கியம்.

11-வது நாளில் கள்ளை பீப்பாய் கரைசலுக்குள் ஊற்றி தொடர்ந்து 7 நாட்கள் இருவேளை கலக்கி வர வேண்டும்.

19வது நாளில் பஞ்சகவ்யா தயார். இதை பயிர்களுக்கு பயன்படுத்தலாம்.

பஞ்சகவ்யா கரைசலை 6 மாதம் வரை வைத்திருக்கலாம், வெப்பத்தின் காரணமாக நீர் ஆவியாகி பாகு தன்மை ஏற்படும் பட்சத்தில் தேவையான அளவு நாட்டுச் சர்க்கரை தண்ணீரை கரைசலுக்குள் ஊற்றினால் மீண்டும் திரவ நிலைக்கு வந்துவிடும்.

பயன்படுத்தும் முறை

தெளிப்பு மற்றும் பாசன நீர்வழி உரமாக எல்லாவகை பயிர்களுக்கும் பயன்படுத்தலாம்.

1 லிட்டர் தண்ணீருக்கு 30 மில்லி பஞ்சகவ்யா என்பது பல பயிர்களுக்கு பலமுறை சோதனை செய்து உறுதி செய்யப்பட்ட அளவீடு. இதை கூட்டவோ, குறைக்கவோ கூடாது.

15 நாட்களுக்கு ஒருமுறை அதிகாலை அல்லது இளமாலை வேளைகளில் பயிருக்கு தெளிக்கவேண்டும்.

தெளிப்பு உரமாக பயன்படுத்தும்போது கண்டிப்பாக கரைசலை வடிகட்டிய பிறகுதான் தெளிப்பு செய்யவேண்டும்.

விதை மற்றும் நாற்று நேர்த்தி செய்யவும் பஞ்சகவ்யா பயன்படுகிறது.

முதலில் சொன்ன அளவீட்டில் விதை அல்லது நாற்றுக்களை நனைத்து நிழலில் உலரவைத்து நடவு செய்யவேண்டும்,

இப்படிச் செய்வதால் விதைகளில் முளைப்புத் திறன் அதிகரிக்கும். நாற்றுக்களில் வேர் சம்பந்தமான நோய் ஏற்படும் வாய்ப்பு குறையும்.

இந்த பஞ்சகவ்யா, தழை, மணி, சாம்பல் சத்துக்களை பயிர்களுக்கு கொடுப்பதுடன், வளர்ச்சி ஊக்கியாகவும், நுண்ணூட்ட சத்துக்களை வேர்களுக்கு அள்ளிக்கொடுக்கும் அமுத சுரபியாகவும் இருக்கும்.

பஞ்சகவ்யா-5

பட்டணங்களுக்குப் பயணிக்கும் பஞ்சகவ்யா... மாதம் `30 ஆயிரம் வருமானம்!

பஞ்சகவ்யா உருவான விதம் ஆரம்ப காலத்தில் அதைப் பயன்படுத்தியவர்கள், பரவலாக விவசாயிகளிடம் கொண்டு சேர்த்தவர்கள் குறித்து கடந்த இதழ்களில் பார்த்தோம். அந்த வரிசையில் இந்த இதழில், தனது அனுபவங்களைப் பகிர்ந்து கொள்கிறார், கொடுமுடி அருகில் உள்ள முத்தூர் பகுதியைச் சேர்ந்த ‘முன்னோடி இயற்கை விவசாயி’ புரவிமுத்து என்கிற முத்துசாமி.

பதினைந்துக்கும் மேற்பட்ட நாட்டு மாடுகளை தனது பண்ணையில் வளர்த்து வருகிறார், முத்துசாமி. தன் மனைவி ஈஸ்வரி சகிதம் பஞ்சகவ்யா தயாரிப்பில் இருந்தவரிடம் பேசினோம். “புரவிப்பாளையம் கிராமம்தான் என்னோட சொந்த ஊர். காளிங்கராயன் வாய்க்கால் பாசனத்துல, நெல், கரும்பு, மஞ்சள்னு முப்போகம் வெளைச்சல் எடுக்கிற நஞ்சைக்காட்டு விவசாயி. ஆரம்பத்துல எல்லாரையும் போல மூட்டைக்கணக்கில் உரத்தையும், லிட்டர் கணக்கில் பூச்சிக்கொல்லியையும் மண்ணுல கொட்டுன விவசாயிதான் நானும். ஆனா, பதினெட்டே நாளில் என்னை இயற்கை விவசாயத்துக்கு மாற வெச்சது பஞ்சகவ்யாதாங்க” என்று பீடிகை போட்ட முத்துசாமி, தான் தயாரித்த பஞ்சகவ்யா கரைசலை மண்பானையில் ஊற்றி வைத்து விட்டு பேச்சைத் தொடர்ந்தார்.

பாம்புக் கடி... பஞ்சகவ்யா!

“2003-ம் வருஷம்னு நெனைக்கிறேன். ஒரு ராத்திரி வேளை, கடலைக்காட்டுக்கு பாசனம் செஞ்சிக்கிட்டு இருந்தேன். மடை திருப்புறதுலயே கவனமா இருந்த நான் வரப்பில் படுத்துக்கிடந்த பாம்பை கவனிக்காம மிதிச்சிட்டேன். கால் மணிக்கட்டுப் பக்கத்துல பட்டுனு ஒரு கடி கடிச்சிடுச்சு. பச்சை மிளகாயக் கடிச்ச மாதிரி ‘சுர்’னு வலி மண்டைக்கு ஏறுது. என்னை மாட்டு வண்டியில ஏத்திக்கிட்டுப் போய், கொடுமுடி டாக்டர் நடராஜன் ஆஸ்பத்திரியில சேர்த்தாங்க. 

முதலுதவி செஞ்ச டாக்டர், ‘தாமதிக்காம கொண்டுவந்துட்டீங்க. இல்லைனா, நிலைமை மோசமாகியிருக்கும். கொஞ்சநாள் ஆஸ்பத்திரியிலேயே இருக்க வேண்டியிருக்கும்’னு சொன்னார். 

18 நாள் அங்கேயே தங்க வெச்சு வைத்தியம் பார்த்தாரு. அப்ப அவரோட ரொம்ப நேரம் பேசக்கூடிய வாய்ப்பு கிடைச்சது. நாட்டு நடப்பு, உலக நடப்புனு பல விஷயங்கள் பேசுவோம். அப்படி பேசும் போதுதான் பஞ்சகவ்யா கரைசல் குறித்த பேச்சும் வந்தது. குணமாகி ஆஸ்பத்திரியில் இருந்து கிளம்பும் போது, 5 லிட்டர் பஞ்சகவ்யா கரைசலை அன்பளிப்பா கொடுத்தார். அதைத் தயாரிக்கும் முறைகளையும் சொல்லிக் கொடுத்து அனுப்பினார்.

வயலில் ஒரு பரிசோதனை!

வீட்டுக்கு வந்த அடுத்த நாளே மஞ்சள், கடலை ரெண்டுலயும் பஞ்சகவ்யாவைத் தெளிச்சு பரிசோதனை பண்ணிப்பாக்கலாம்னு வேலைகளை ஆரம்பிச்சிட்டேன். விதைச்சு 15 நாளாகியிருந்த இளங்கடலைச் செடிகள்ல, ஒரு மூலையிலிருந்த செடிகள்ல மட்டும்... ஒரு லிட்டர் தண்ணீருக்கு 30 மில்லி பஞ்சகவ்யானு கலந்து, தெளிச்சேன். தொடர்ந்து தெளிச்சுப் பார்த்தப்போ, ரசாயனம் போட்ட செடிகளுக்கும் பஞ்சகவ்யா தெளிச்ச செடிகளுக்கும் நல்ல வித்தியாசம் தெரிஞ்சது. பஞ்சகவ்யா தெளிச்ச செடிகள் நல்லா ‘தளதள’னு பளீர்னு இருந்துச்சு. மஞ்சள் செடிகள்லயும் அதே மாதிரி வித்தியாசம் இருந்தது. அப்போதான் பஞ்சகவ்யாவில் ஏதோ விஷயம் இருக்குனு நான் புரிஞ்சுக்கிட்டேன். தொடர்ந்து பஞ்சகவ்யாவைப் பயன்படுத்த ஆரம்பிச்சேன். 

அப்புறம், கொடுமுடி டாக்டர் மூலமா நம்மாழ்வார் அய்யாவோட தொடர்பு கிடைச்சது. அப்புறம்தான் அய்யா தலைமையில நடந்த கருத்தரங்கு, களப்பயிற்சிகள்னு கலந்துக்க ஆரம்பிச்சேன்” என்ற முத்துச்சாமி தொடர்ந்தார்.

“அந்த சமயத்துல குடும்பச் சூழல் காரணமா புரவிப்பாளையத்தில் இருந்து 21 கிலோ மீட்டர் தள்ளியிருக்கிற முத்தூர் மேட்டுக்கடைங்கிற இடத்துக்கு குடிபோக வேண்டியதாயிடுச்சு. அந்த ஊர்ல நெறைய முத்துசாமிகள் இருந்ததால, என்னை ‘புரவி முத்து’னு கூப்பிட ஆரம்பிச்சிட்டாங்க. அங்க 10 ஏக்கர் மானாவாரி பூமி வாங்கி போர்வெல் போட்டு... மாதுளை, கொய்யா, சப்போட்டா, மா, நெல்லி, புளி, எலுமிச்சைனு நட்டேன். 

அந்தப் பண்ணைக்கு வந்த நம்மாழ்வார் அய்யா, ஒரு நாள் முழுக்க தங்கியிருந்து சில ஆலோசனைகள் சொன்னார். ‘நாட்டு மாடுகள் வளர்க்க ஏத்த ஊரு இது. அதுவும் இங்கு வெளையுற புல்லு, சீதோஷ்ண நிலை ரெண்டும் நாட்டுமாடுகளுக்கு ஏத்தது. உங்களுக்கு போதிய மேய்ச்சல் நெலமும் இருக்கு. அதனால, காங்கேய இன மாடுகளை காப்பாத்துங்க’னு அன்புக்கட்டளை போட்டார், அய்யா. அப்படியே என்னோட பண்ணைக்கு ‘கனிச்சோலை’னு பேர் வெச்சிட்டுப் போனார்.

உடனே 4 நாட்டு மாடுகளை வாங்கினேன். இப்போ 15 நாட்டுப் பசுக்களும் ரெண்டு காங்கேயம் காளைகளும் இருக்கு. அதுகளுக்கு தேவையான பசுந்தீவனம் இங்கயே உற்பத்தியாகுது. ரெண்டு ஏக்கர்ல கோ-3, கோ.எஸ்.எஃப்- 29, கினியா புல் மூணையும் வளர்த்துக்கிட்டு வர்றேன். 15 நாளுக்கு ஒரு முறை 10 லிட்டர் தண்ணீரில் 300 மில்லி பஞ்சகவ்யாவைக் கலந்து தீவனப்பயிர்களுக்குத் தெளிச்சாலே ‘தளதள’னு வளருது. பார்க்கிறவங்க ‘இது, கரும்பா?’னு கேக்குறாங்க. என்ற முத்துச்சாமி, பசுந்தீவன வயல்களைச் சுற்றிக்காட்டிக்கொண்டே தொடர்ந்தார்.

பார்சலில் பஞ்சகவ்யா!

“நாட்டு மாடுகள்ல என்ன வருமானம் கிடைச்சிடப்போகுது? தொழுவுரத்துக்கும் பஞ்சகவ்யா தயாரிக்கவும் ரெண்டு மாடுகள் போதாதா... 15 மாடுகள் எதுக்கு?னு எல்லாரும் கேட்டாங்க. அந்த சமயத்துல, ‘பசுமை விகடன்’, மூலமா அறிமுகமான சென்னைவாசி ஒருத்தர் ‘ நாட்டு மாட்டிலிருந்து தயாரிக்கப்பட்ட பஞ்சகவ்யா தேவை’னு கேட்டிருந்தார். அவர்கிட்ட பேசினப்போ, 10 லிட்டர் ஆர்டர் கொடுத்து பணம் அனுப்பி வெச்சார். நான் பஞ்சகவ்யாவை பார்சல் செய்து லாரியில் அனுப்பி வெச்சேன். ரெண்டு மாசம் கழிச்சு அவர் திடீர்னு போன் செய்து... ‘நாட்டுப் பசுமாட்டின் பஞ்சகவ்யா நல்லா வேலை செய்யுது. வீரியம் அதிகம். இன்னும் 10 லிட்டர் அனுப்புங்க’னு ஆர்டர் கொடுத்தார். அடுத்து அவரோட நண்பர்களும் எனக்கு ஆர்டர் கொடுக்க ஆரம்பிச்சாங்க. 

இப்ப, ஒரு லிட்டர் 150 ரூபாய்னு மாசம் 180 லிட்டர் பஞ்சகவ்யாவை சென்னைக்கு அனுப்பிக்கிட்டிருக்கேன். அது போக கோயம்புத்தூருக்கு 50 லிட்டரும், திருச்சிக்கு 30 லிட்டரும் அனுப்புறேன். இயற்கை இடுபொருட்களைப் போட்டு வீட்டுத்தோட்டம் அமைக்கிறவங்க அதிகரிச்சிக்கிட்டு வர்றதால, பஞ்சகவ்யா தேவை அதிகரிச்சிக்கிட்டே இருக்கு. 2017-ம் வருஷம் ஆயிரம் லிட்டர் பஞ்சகவ்யாவை அனுப்பனும்னு இலக்கு வெச்சிருக்கேன். 

பஞ்சகவ்யா மட்டுமில்லாம, பசுப் பொருட்கள் மூலமா அர்க், விபூதி, ஷாம்பூ,சோப்பு, ஊதுபத்தி, சாம்பிராணினும் தயாரிச்சிக்கிட்டிருக்கேன்” என்ற முத்துச்சாமி நிறைவாக,

“இப்போ, பஞ்சகவ்யா மூலம் குறைஞ்சபட்சமா மாசம் 30 ஆயிரம் ரூபாய் வருமானம் வருது. இன்னும் ரெண்டு வருஷத்துல மாசம் ஒரு லட்சம் ரூபாய் வருமானத்தைத் தொட்டுடுவேன். பஞ்சகவ்யா மட்டும் இல்லேன்னா இந்தமாதிரியான வறட்சியான பருவநிலையிலே வெள்ளாமையே இல்லாமபோய், ஆளுக்கு ஒரு மூலைக்கு வேலைக்குப் போயிருப்போம். பஞ்சகவ்யா வெள்ளாமைய மட்டுமில்லாம எங்க வீட்டையும் செழிக்க வெச்சிடுச்சு. இன்ஜினீயரிங் படிச்சிருக்கிற என் பிள்ளைங்க வெளிநாடுகளுக்கு பஞ்சகவ்யாவை அனுப்ப முயற்சி செய்துகிட்டு இருக்கிறாங்க. சீக்கிரம் விமானத்துல பயணிக்கப்போகுது நாங்க தயாரிக்கிற பஞ்சகவ்யா” என்று நம்பிக்கையுடன் சொன்னார்.

தொடர்புக்கு,

புரவிமுத்து,

செல்போன்: 99659-29098.

பஞ்சகவ்யா - 4

*பஞ்சகவ்யா கலந்த தீவனத்தில் நான்கு வகையான இனிப்புச் சுவைகள் இருக்கும்.

*பால் உற்பத்தி அதிகரிக்கும்.

*சரியான பருவத்தில் சினை பிடிக்கும்..

*குடல்புழு நீக்கம் செய்யலாம்.

பஞ்சகவ்யா உருவான விதம், ஆரம்ப காலத்தில் அதைப் பயன்படுத்திய விவசாயிகள் சிலரின் அனுபவங்கள் குறித்து கடந்த சில இதழ்களில் பார்த்து வருகிறோம். அந்த வரிசையில் அடுத்து நாம் சந்திக்க இருக்கும் நபர், கால்நடை மருத்துவர் எம்.ஆறுமுகம். ஈரோடு மாவட்டம், கொடுமுடியில் வசித்து வரும் 76 வயது நிரம்பிய ஆறுமுகம், கால்நடை மருத்துவத் துறையில் இணை இயக்குநராகப் பணிபுரிந்து ஒய்வுபெற்றவர்.

‘வள் வள்’ நாய்களை வாலாட்ட வைத்த பஞ்சகவ்யா!

‘‘பஞ்சகவ்யா எனக்கு அறிமுகமானதே ஒரு சுவையான அனுபவம்தான். கிராமங்கள்ல இருக்கிற ஆடு, மாடுகளுக்கு வைத்தியம் பார்க்கிறதுதான் என்னோட வேலை. அப்படி கிராமங்களுக்குப் போகிற சமயத்துல, தெருநாய்ங்க தொல்லை அதிகமா இருக்கும். சிலசமயம் கடி வாங்கியதும் உண்டு. அப்படி ஒருமுறை நாய் துரத்தி, மோட்டார் சைக்கிளில் இருந்து கீழே விழுந்துட்டேன். அதுக்கு மருத்துவம் பார்க்கத்தான் டாக்டர். நடராஜன்கிட்ட போனேன். காயத்துக்கு வைத்தியம் பார்த்து ஆறுதல் சொன்னவர், ‘இனி எந்த நாயும் உங்களைக் கண்டால் குலைக்காது, கடிக்காது. உங்களைக் கண்டதும் வாலாட்டி வரவேற்கும். அந்த மந்திரத்தை உங்களுக்குக் கொடுக்கிறேன். அது கையில் இருக்கும் வரை எல்லா நாய்களும் உங்களுக்கு நல்ல நண்பன்தான்’னு சொன்ன டாக்டர், பஞ்சகவ்யா கரைசலைப்பற்றி விளக்கமா எடுத்துச் சொன்னதோட, ‘இந்த பஞ்சகவ்யாவில இருக்கிற இனிப்புச் சுவை நாய்ங்களுக்கு ரொம்ப பிடிக்கும். அதோடு இதை தொடர்ந்து சாப்பிடும் நாய்கள் ஆரோக்கியமாவும் இருக்கும். சொறி நாய்கூட சில நாளில் குணமாகி விடும். இனி உங்களைத் துரத்திக்கிட்டு வர்ற நாய்களை, இந்தக் கரைசலில் 50 மில்லி அளவுக்குக் குடிக்க வையுங்க. அப்புறம் பாருங்க இதோட மகிமையை’ னு சொல்லியபடி, பஞ்சகவ்யா கரைசலையும் கொடுத்தனுப்பினார்.

அடுத்த நாள் ஒரு கிராமத்துக்குப் போனேன். வழக்கம் போலவே நாய்ங்க கூட்டமா வந்துச்சு. பயப்படாம, வண்டியைவிட்டிறங்கி, பெட்டியில் இருந்த பஞ்சகவ்யா கரைசலை எடுத்து தார் ரோட்டுல கொஞ்சமா ஊத்தி விட்டுட்டு, நின்னுக்கிட்டேன். முதல்ல ஒரு நாய் மட்டும் வாலை இடுக்கிக்கிட்டு, பம்மி பம்மி வந்து பஞ்சகவ்யா கரைசலை முகர்ந்து பார்த்துச்சு, மெதுவா நக்கி ருசி பார்க்க ஆரம்பிச்சுது. கொஞ்ச நேரத்துல வாலை ஆட்டியபடியே என்கிட்ட வந்து நின்னுது. இன்னும் கொஞ்சம் பஞ்சகவ்யாவை தார் ரோட்டுல ஊத்திவிட்டேன். மத்த நாலு நாய்களும் அதைக் குடிச்சுட்டு, என்னை சினேகமாய் பார்த்துச்சு. அடுத்து போன கிராமத்துலயும் கூட இதே மாதிரி செஞ்சேன். இதனால என்னைத் துரத்தின தெருநாய்ங்க, ஒரு கட்டத்தில வாலாட்டிக்கிட்டு, தோழமைகாட்ட ஆரம்பிச்சுதுங்க. எனக்கும் பஞ்சகவ்யா மேல, ஒரு விதமான ஈர்ப்பு உருவாச்சு.

இந்தக் காலக் காட்டத்துல, பயிர்களுக்கு பஞ்சகவ்யா கரைசலைப் பயன்படுத்துறது சம்பந்தமா டாக்டர். நடராஜன் இரவு நேரத்துல, கூட்டங்களை நடத்திக்கிட்டு இருந்தார். ஆர்வம் காரணமா நானும் அதுல தொடர்ந்து கலந்துக்கிட்டேன். அப்போ ஒருநாள், கால்நடைத் தீவனப் பயிர்களுக்கும் பஞ்சகவ்யாவைப் பயன்படுத்தி பார்க்கலாமேனு முடிவு செஞ்சோம். முத்துசாமிங்கிற விவசாயி தோட்டத்துல இருந்த தீவனப்பயிர்கள்லதான் முதல்ல பஞ்சகவ்யாவைப் பயன்படுத்தினோம். அந்த தீவனத்தைத் தின்கிற கால்நடைகள்ல சில மாற்றங்கள் ஏற்பட்டதைக் கண்டுபிடிச்சோம். வழக்கமான தீவனப் புல்லுல ரெண்டு இனிப்புச் சுவை இருக்கும். ஆனா, பஞ்சகவ்யா தெளித்த தீவனப்புல்லுல நாலு இனிப்பு இருந்துச்சு. செரிமானமும் கூட சீக்கிரமா நடந்துச்சு. கூடவே பால் அடர்வுத் தன்மையும் அதிகமாக இருந்துச்சு. மாடுங்க சரியான பருவத்துல சினை பிடிச்சு, ஆரோக்கியமான கன்னுக்குட்டியை கொடுத்துச்சு. கறவை மாடுகளோட பால் உற்பத்தியும் அதிகரிச்சது. இந்த சம்பவத்திலிருந்து தீவனப்பயிர்களுக்கும் பஞ்சகவ்யா கொடுங்கனு நான் எல்லோர்கிட்டயும் சொல்லிக்கிட்டு வர்றேன்.

நம்மாழ்வார் நடைப்பயணம்!

2000-ம் வருஷம் வாக்குல, ஈரோடு மாவட்டம், பவானி சாகர் அணையில இருந்து கொடுமுடி வரையிலும், இயற்கை விவசாய விழிப்பு உணர்வை வலியுறுத்தி நடைப்பயணமா வந்தாரு ‘இயற்கை வேளாண் விஞ்ஞானி’ நம்மாழ்வார் அய்யா. அந்த நடைப்பயணத்துல நானும் கலந்துக்கிட்டேன். வழியில தென்படற விவசாயிகள்கிட்டயெல்லாம் பஞ்சகவ்யா பத்தின பெருமையைப் பேசிக்கிட்டே போவாரு அய்யா.

குடற்புழுவைக் குணமாக்கிய பஞ்சகவ்யா

நடைப்பயண வழியில, ஆட்டு மந்தைக்கூட்டம் எங்களைக் கடந்து போச்சு. ஆடுங்க இளைச்சு, முடி உதிர்ந்து இருந்துச்சு. அதில சில ஆடுங்க நடக்க தெம்பில்லாமலும் தென்பட்டது. அதைப் பார்த்த நம்மாழ்வார் அய்யா, ஆடு மேய்க்கிற நபரைக் கூப்பிட்டு, விசாரிச்சார். ‘‘ஆடுகளோட வயித்துல குடற்புழுங்க இருக்கு. அதனாலதான் ஆடுங்க இப்படி நோஞ்சானா இருக்குய்யா’’னு ஆட்டுக்காரர் பதில் சொன்னாரு.

‘‘சரி, குடற்புழு நீக்கம் செய்யவேண்டியதுதானே?’’னு அய்யா கேட்டார்.

‘‘குடற்புழு நீக்கம் செய்ய ஆடு ஒண்ணுக்கு 50 ரூபாய் செலவு பிடிக்கும். இப்ப கையில காசு இல்லை. காசு கைக்கு வந்ததும் மருந்து வாங்கி குடற்புழு நீக்கம் செய்யணும்’’ னு பதில் சொன்னாரு ஆட்டுக்காரர்.

பக்கத்துல இருந்த என்னைப் பார்த்த நம்மாழ்வார் அய்யா, ‘‘குடற்புழு நீக்கம் செய்ய பஞ்சகவ்யா கரைசலைக் கொடுத்துப் பார்க்கலாமா?’’னு கேட்டார். ‘‘தவறு ஒண்ணும் கிடையாது, கொடுத்துப் பார்க்கலாம்’’னு சொன்னேன்.

உடனே ஆடு மேய்க்கிறவரைக் கூப்பிட்டு, பஞ்சகவ்யா பத்தி பாடம் நடத்தின நம்மாழ்வார் அய்யா, குடல்புழு நீக்கம் செய்றதுக்கு அதையே கொடுக்கலாம்னு ஆலோசனையும் சொன்னாரு. ஆடு மேய்க்கிறவரும் சம்மதம் தெரிவிச்சாரு. உடனே 30 மில்லி பஞ்சகவ்யா கரைசலை சில ஆட்டுக்குட்டிங்க வாயில ஊத்திவிட்டோம்.

‘‘இன்னைக்கு ராத்திரி உங்கள் கிராமத்திலதான் தங்கப்போறோம். நாளை மதியம் வரை இருப்போம். பஞ்சகவ்யா குடிச்ச ஆடுங்க எப்படி இருக்குனு வந்து சொல்லணும்’’னு ஆட்டுக்காரருக்கு அன்புக் கட்டளையும் போட்டார் அய்யா நம்மாழ்வார்.

அடுத்த நாள், ஆட்டுக்காரர் வேகமாக ஓடிவந்தாரு. ‘என்னாச்சு?’னு பதட்டத்துடன் கேட்டோம். ‘‘ஒண்ணும் இல்லீங்க. நேத்து நீங்க கொடுத்த மருந்து நல்லா வேலை செஞ்சிருக்கு. அதைக் குடிச்ச ஆட்டுகுட்டிங்க வயித்தில இருந்த குடல்புழு எல்லாம் வெளியேறி வயிறு சுத்தம் ஆயிடுச்சுங்க. இன்னும் பாக்கி இருக்கிற ஆடுகளுக்கும் அதைக் கொடுக்கணும். மிச்சம் மீதி இருந்தா அந்த மருந்தைக் கொடுங்க?’’னு எங்க கிட்ட கேட்டார். என்கிட்ட மீதியிருந்த பஞ்சகவ்யாவை கொடுத்துவிட்டேன். மேலும், விவரம் வேணும்னா என் முகவரிக்கு வரச்சொல்லி, எழுதிக் கொடுத்தேன்.

அடுத்த ஊர்க்கூட்டத்தில இருந்து, ‘கால்நடைங்களுக்கு குடல்புழு நீக்கம் செய்ய பஞ்சகவ்யா அருமையான மருந்து’னு நம்மாழ்வார் அய்யா பேசத்தொடங்கிட்டாரு. நடைப்பயணம் முடிஞ்ச பிறகும், நான் வைத்தியம் பார்க்க போற கிராமங்களுக்கெல்லாம் வந்து பார்த்து, ஒவ்வொரு கால்நடைகளுக்கும் பஞ்சகவ்யா கொடுக்க வேண்டிய அளவு எவ்வளவு இருக்கணும்னு இறுதி வடிவம் கொடுத்தது அய்யா நம்மாழ்வார்தான்’’ என்று மலரும் நினைவுகளைச் சொல்லி முடித்தார் கால்நடை மருத்துவர் ஆறுமுகம்.

-மணம் பரப்பும்

கால்நடைகளுக்கு கொடுக்க வேண்டிய அளவு!

ஒரு கால்நடைக்கு குடற்புழு நீக்கம் செய்ய 30 மில்லி பஞ்சகவ்யா.

பசு, எருமை மாடுகள் உடனே சினைப்பிடிக்க ஒரு மாட்டுக்கு 100 முதல் 250 மில்லி.

கோழி முட்டைகளின் மஞ்சள்கரு திடமாக இருக்கவும், முட்டை ஒரே அளவில் கிடைக்கவும், ஒரு லிட்டர் தண்ணீருக்கு அரை மில்லி பஞ்சகவ்யாவை கலந்து கோழிகளுக்குக் கொடுக்கவேண்டும். இது பத்து கோழிகளுக்கான அளவு.

பஞ்சகவ்யா - 3

மல்லிகையில் மட்டுமல்ல... வாழ்விலும் மணம் கூட்டிய பஞ்சகவ்யா...

*நாட்டுச்சர்க்கரை சேர்த்தால் கூடுதல் பலன்.

*விளைச்சல் அதிகரிக்கும்.

*40% உரச்செலவுகள் குறையும்.

*பூச்சி, நோய்கள் தாக்காது.

ஈரோடு மாவட்டம், கருக்கம்பாளையம் கிராமத்தைச் சேர்ந்த செல்லமுத்துவின் வாழ்க்கையில் பஞ்சகவ்யா ஏற்படுத்திய இனிய மாற்றம் குறித்து கடந்த இதழில் பார்த்தோம். தொடர்ந்து, கரட்டுப்பாளையம் கிராமத்தைச் சேர்ந்த ஈஸ்வரமூர்த்தி என்பவரைப் பற்றி நமக்கு அறிமுகம் கொடுத்தார், டாக்டர்.நடராஜன். உடனே, கரட்டுப்பாளையத்துக்குப் பயணமானோம்.

வளைந்து நெளிந்து ஓடும் காலிங்கராயன் வாய்க்கால் கரையில் இருக்கும் அழகிய ஊர், கரட்டுப்பாளையம். வாய்க்கால் கரையில் சிறிது தூரம் நடந்தால், அதிலிருந்து பிரிந்து செல்லும் ஒத்தையடிப்பாதையின் இருபுறமும் மலர்ந்து நிற்கிறது, ஈஸ்வரமூர்த்தியின் மஞ்சள் காடு. வாய்க்கால் தண்ணீரை, வழிய வழிய மஞ்சள் காட்டுப் பாத்திகளில் நிரப்பிக் கொண்டிருந்தார், ஈஸ்வரமூர்த்தி. அவரிடம் நம்மை அறிமுகப்படுத்திக் கொண்டதும்... “வாங்க, வாங்க... நீங்க வருவீங்கனு டாக்டர் போன் போட்டு சொல்லிட்டாருங்க” என்று வரவேற்றுப் பேச ஆரம்பித்தார்.

பிள்ளைகளைப் படிக்க வைத்த பஞ்சகவ்யா!

“நான் பி.காம் படிச்சிட்டு வேலையெல்லாம் தேடி அலையாம முழுநேர விவசாயியா மாறிட்டேன். காலிங்கராயன் பாசனத்தில் நாலு ஏக்கர் நஞ்சை நிலம் இருக்கு. எனக்கு ரெண்டு பொண்ணுங்க. மூத்த பொண்ணு ரேவதி சுதர்சனா. எம்.சி.ஏ படிச்சிட்டு சென்னையில ஒரு தனியார் நிறுவனத்தில் உயர் அதிகாரியா இருக்கிறாங்க. ரெண்டாவது பொண்ணு கிருபா. ‘சென்ட்ரல் எலெக்ட்ரோ கெமிக்கல் ரிசர்ச் இன்ஸ்டியூட்’ல (சி.இ.சி.ஆர்.ஐ) பி.டெக் படிச்சிட்டு மலேசியாவில் வேலை பார்க்கிறாங்க. மின்னணுக் கழிவு மேலாண்மைக்காக, இவருக்கு ‘தங்க காப்பு’ விருதை மலேசியா அரசாங்கம் கொடுத்திருக்கு. ‘இதையெல்லாம் எதுக்குடா இவர் சொல்லிக்கிட்டு இருக்கார்?’னு யோசிக்கிறீங்களா... அங்கதான் விஷயமே இருக்கு.

நான் இன்னிக்கு இந்த நிலைமையில இருக்கிறது, என் பொண்ணுகளை இந்தளவுக்கு நல்லா படிக்க வெச்சது, சிறப்பா கல்யாணம் பண்ணி வெச்சது... எல்லாத்துக்கும் பஞ்சகவ்யா ஒரு முக்கிய காரணம். அதுக்காகத்தான் இதை உங்ககிட்ட சொன்னேன்” என்று பெருமையாகச் சொன்ன ஈஸ்வரமூர்த்தி, அடுத்த மடைக்கு மண்வெட்டியால் தண்ணீரைத் திருப்பி விட்டு வந்து தொடர்ந்தார்.

சோதனைக்கு 10 சென்ட்!

“நோய்க்கு வைத்தியம் பார்க்கத்தான் டாக்டர் நடராஜன்கிட்ட போனேன். நான் விவசாயிங்கிறதால, வைத்தியம் பார்த்த கையோடு, பஞ்சகவ்யா குறித்தும் செல்லமுத்து குறித்தும் விலாவாரியா சொல்ல ஆரம்பிச்சிட்டார். அதோட, ‘இதைப் பயன்படுத்துனவங்க எல்லாருமே நல்லா இருக்குனுதான் சொல்றாங்க... நீங்களும் இதைப் பயன்படுத்திப் பாருங்க’னு சொல்லி ஒரு லிட்டர் பஞ்சகவ்யா கரைசலை இலவசமாவே கொடுத்தனுப்பினார். எனக்கு அதில் பெரிய ஈடுபாடு இல்லை. டாக்டர் முகத்துக்காக வாங்கிட்டுப்போன பஞ்சகவ்யாவை மாட்டுத்தொழுவத்தில் மறைச்சு வெச்சிக்கிட்டேன்.

அடுத்த முறை டாக்டர் கிட்ட போனப்போ, ‘பஞ்சகவ்யா தெளிச்சீங்களா?’னு கேட்டார். ‘புதுசா எதையாச்சும் தெளிச்சு வெள்ளாமைக்கு வம்பு வந்துடப் போகுது. நாமளே நாலு ஏக்கர் வெச்சிருக்கிற சிறு விவசாயி, நஷ்டம் வந்தா தாங்கமுடியாது’னு வீட்ல பயப்படுறாங்கனு சொன்னேன். பலமா சிரிச்ச டாக்டர், ‘உங்க பயத்துல நியாயம் இருக்கு. நான் ஒரு யோசனை சொல்றேன். அதுபடி செய்யுங்க. அதையும் மீறி நஷ்டம் வந்துட்டா அதை நான் ஏத்துக்கிறேன்’னு சொன்னார். நான், ‘சரி’னு சொல்லவும்... ‘முழு வயல்லயும் பஞ்சகவ்யாவைத் தெளிக்க வேண்டாம். பத்து சென்ட் அளவில் உள்ள பயிர்கள்ல மட்டும் தெளிச்சுப் பார்த்துட்டு வந்து சொல்லுங்க’னார்.

அடுத்த நாள், என்னோட மஞ்சள் வயல்ல ஒரு மூலையில் பத்து சென்ட் நிலத்தை பஞ்சகவ்யா தெளிக்கிறதுக்காக ஒதுக்கி... பத்து லிட்டர் தண்ணீர்ல 300 மில்லி பஞ்சகவ்யாவைக் கலந்து தெளிச்சேன். வாரம் ஒரு தடவைனு மூணு வாரம் தெளிச்சேன். மத்த மஞ்சள் பயிரெல்லாம் ‘தளதள’னு இருக்க, இந்த பத்து சென்ட் மஞ்சள் செடிங்க மட்டும் பழுத்துப் போச்சு. வீட்டுல ‘குய்யோ முய்யோ’னு புலம்ப ஆரம்பிச்சிட்டாங்க.

உடனே, டாக்டர்கிட்ட போய் சொன்னேன். அவர், ‘5 கிலோ சாணம், 5 லிட்டர் மாட்டுச் சிறுநீர், 2 லிட்டர் பால், 2 லிட்டர் தயிர், 1 லிட்டர் நெய் கலந்து இதைத் தயார் பண்ணுனேன். ஒரு வேளை சிறுநீர் அதிகமா இருக்கிறதால இலை பழுத்திருக்கும். சிறுநீரை மட்டும் 3 லிட்டரா குறைச்சிட்டா சரியாகிடும்னு சொன்னார். அதோட இன்னும் சில விவசாயிகள் கிட்டயும் பேசினார். அவங்க எல்லாருமே பஞ்சகவ்யா குறித்து எதிர்மறையா எதுவுமே சொல்லலை. எனக்கும் அதுல கொஞ்சம் ஆர்வம் வந்துடுச்சு. உடனே, நானே 5 கிலோ சாணம், 3 லிட்டர் மாட்டு சிறுநீர், 2 லிட்டர் பால், 2 லிட்டர் தயிர், 1 லிட்டர் நெய்னு கலந்து பஞ்சகவ்யா தயாரிச்சு இன்னொரு பத்து சென்ட் வயல்ல தெளிச்சேன். பயிர்ல நல்ல மாற்றம் தெரிய ஆரம்பிச்சது. உடனே வயல் முழுக்க தெளிக்க ஆரம்பிச்சிட்டேன்.

ஆனா, பக்கத்து தோட்ட விவசாயிகள்ல்லாம் என்னை ரொம்பவே கேவலப்படுத்த ஆரம்பிச்சிட்டாங்க. ஆனா, செடிகள் நல்லா வளர்ந்ததைப் பார்த்து அவங்களை நான் கண்டுக்கவேயில்லை. அந்த வருஷம் மஞ்சள் வழக்கத்தை விட நல்லாவே விளைஞ்சது. அதில்லாம உரச்செலவு 40 சதவிகித அளவுக்கு குறைஞ்சது. பூச்சி, நோய்கள் வரவேயில்லை. அதனால பூச்சிக்கொல்லி, மருந்தடிக்கிற செலவெல்லாம் மிச்சமாச்சு” என்ற ஈஸ்வரமூர்த்தி தொடர்ந்தார்.

“அதுக்கப்புறம் எனக்கு பஞ்கவ்யா மேல அதிக நம்பிக்கை வந்துடுச்சு. நானே தயாரிச்சு பயன்படுத்த ஆரம்பிச்சேன். அதுல நொதிப்புத் தன்மை குறைவா இருக்கவும்... டாக்டர்கிட்ட அது குறித்து விளக்கம் கேட்டேன். அவர், ‘இனிப்பு சேர்த்து பாருங்க’னு சொன்னார். உடனே, வழக்கமான பொருள்களோட ஒரு கிலோ நாட்டு சர்க்கரையையும் சேர்த்து பஞ்சகவ்யா தயாரிச்சப்போ... அது அருமையா நொதிச்சு வந்தது. நுண்ணுயிரிகள் அதிகமா இருந்ததால பலனும் நல்லா இருந்தது. உடனே 80 சென்ட் மல்லிகைக்கு பஞ்சகவ்யாவைத் தெளிச்சுப் பார்த்தேன். சும்மா பூ பூத்து குலுங்கிடுச்சு. பூவெல்லாம் அம்பு மாதிரி இருந்துச்சு. வாசம் ஊரையே தூக்குற அளவுக்கு இருந்துச்சு. அந்த முறை பூ எடுக்க ஆள் பத்தாத அளவுக்கு விளைச்சல்.

தொடர்ந்து பஞ்சகவ்யா தெளிச்சு பூ சாகுபடி பண்ண ஆரம்பிச்சேன். நல்ல மகசூல் கிடைச்சதோட, நல்ல விலையும் கிடைக்க ஆரம்பிச்சது. சுத்துப்பட்டு கிராமங்கள்ல எங்க கல்யாணம்னாலும் மல்லிகைப்பூவை எங்ககிட்டதான் வாங்குவாங்க. எங்க வீட்டுக்கே ‘பூக்காட்டுக்காரர் வீடு’னு பேர் வெச்சுட்டாங்கனா பாத்துக்கங்களேன். அந்தளவுக்கு எனக்கு பெருமை தேடிக் கொடுத்தது, பஞ்சகவ்யாதான். வரவுக்கும் செலவுக்கும் சரியா இருந்த விவசாயம் அதுக்கப்பறம்தான் எனக்கு லாபமா மாற ஆரம்பிச்சது” என்ற ஈஸ்வரமூர்த்தி நிறைவாக,

‘‘இவ்வளவு சக்தி இருக்கிற பஞ்சகவ்யாவை ஏன் அரசாங்கம் கண்டுக்கிடலைனு யோசிச்சு, அதை எடுத்துக்கிட்டு வேளாண்மைப் பல்கலைக்கழகத்துக்குப் போனேன். அப்போ இருந்த துணைவேந்தர்கிட்ட அதைக் காட்டி சொன்னேன். ‘இந்த ஆராய்ச்சியெல்லாம் நாங்க செய்ய வேண்டிய வேலை. நீங்கள்லாம் செய்யக்கூடாது’னு சொல்லி அனுப்பி வெச்சிட்டார். அதுக்கப்பறம் நம்மாழ்வார் அய்யா என் வீட்டுக்கு வந்து ரெண்டு நாள் தங்கி, பஞ்சகவ்யா தயாரிப்பு முறையை எல்லாம் பார்வையிட்டார். அரசாங்கம் செய்ய வேண்டிய வேலையை அவர் கையிலெடுத்துக்கிட்டு போய் பட்டிதொட்டியெல்லாம் கொண்டு சேர்த்துட்டார். இப்போ, பல்கலைக்கழகமும் இதை ஒப்புக்கிட்டாங்கங்கிறது மகிழ்ச்சியான விஷயம்” என்று சொல்லி விட்டு தண்ணீர் பாய்ச்சத் தொடங்கி விட்டார்.

தொடர்புக்கு,
எஸ்.ஈஸ்வரமூர்த்தி,
செல்போன்: 90470-08387.

கால்நடைகளுக்கும் பஞ்சகவ்யா!

“பஞ்சகவ்யாவைக் கலக்கி விடுற கம்பை மூலையில சாத்தி வைப்போம். அதை தோட்டத்துல இருக்கிற நாய்கள்லாம் நக்கும். கோழிங்க கூட அந்த கம்பை கொத்தும். அதைப் பார்த்துட்டு கோழிகளுக்கும், ஆடு, மாடுகளுக்கும் அதைக் கொடுக்க ஆரம்பிச்சேன். எல்லாம் நல்லா ஊட்டத்தோட நோயில்லாம வளர ஆரம்பிச்சது. அப்போதான் தெரிஞ்சது, பஞ்சகவ்யா கால்நடைகளுக்கும் நோய் எதிர்ப்புச் சக்தியைக் கொடுக்கும்னு. ஒரு முறை, வீட்டுல வளர்த்துட்டு இருந்த ‘ஜெர்மன் ஷெப்பர்டு’ நாய்க்கு சொறி பிடிச்சிடுச்சு. அதுக்கு எந்த மருந்தும் கொடுக்காம பஞ்சகவ்யாவை மட்டும் குடிக்க கொடுத்தேன். சொறி சரியாகிடுச்சு. தோல் நோய்களைத் தீர்க்குற அற்புத மருந்து பஞ்சகவ்யா. பலர், ‘சொரியாசிஸ்’ நோயையே குணப்படுத்துதுனு சொல்றாங்க” என்று பெருமையாகச் சொல்கிறார், ஈஸ்வரமூர்த்தி.

பஞ்சகவ்யா - 2

*பஞ்சகவ்யாவில் நாட்டுச் சர்க்கரைக்குப் பதில் கரும்புச்சாறு பயன்படுத்தலாம்.

*மஞ்சள் காட்டில் மண்வாசம்

*நெல் வயலில் நெய்வாசம்

*வீரியமான பூச்சிகொல்லி விஷத்தை வருஷக் கணக்கில் தெளித்தேன்... எனக்கு சுவாசக்கோளாறு, பக்கவாதம், அலர்ஜினு ஏகப்பட்ட நோய்கள் வந்தன.

*இது மண்ணுக்கும் மனிதர்களுக்கும் எந்த பாதிப்பையும் உண்டாக்காது. எல்லா பயிர்களுக்கும் இதைத் தெளிக்கலாம்.

*இந்த 18 ஆண்டுகளில் ஈரோடு பகுதியில் மட்டும் ஆயிரக்கணக்கான விவசாயிகள்
பஞ்சகவ்யாவுக்கு மாறி பலன் பெற்றுள்ளார்கள்.

பக்திப் பிரசாதமாக விளங்கிய பஞ்சகவ்யாவைப் பண்ணைக்குக் கொண்டு வந்து சேர்த்த விவரங்களைக் கடந்த இதழில் பகிர்ந்துகொண்ட கொடுமுடியைச் சேர்ந்த மருத்துவர் கே.நடராஜன், தனது அனுபவங்களைத் தொடர்கிறார்.

“எனது வீட்டில் இருந்த முருங்கைச்செடிக்கு பஞ்சகவ்யா கரைசலைத் தெளித்த பிறகு, அதில் நல்ல மாற்றம் ஏற்பட்டது. வெட்டி அப்புறப்படுத்தலாம் என்ற எண்ணம் மாறிப்போனது. சடைசடையாய் காய்கள் காய்த்துத் தொங்கின. முதல் பரிசோதனை வெற்றியடைந்ததில் அளவில்லா மகிழ்ச்சி ஏற்பட்டது. அடுத்து விவசாயப் பயிர்களில் பரிசோதனை செய்து பார்த்து விடலாம் என்ற எண்ணத்தில், பஞ்சகவ்யா கரைசலைத் தயாரித்து வைத்துக்கொண்டு, முன்னோடி விவசாயி யாராவது கிடைப்பாரா எனத் தேடிக்கொண்டிருந்தேன். அப்போது ஆபத்பாந்தவனாக வந்து சேர்ந்தார், ‘கருக்கம்பாளையம்’ செல்லமுத்து.

என் மருத்துவமனைக்கு சிகிச்சைக்காக வந்த இவர்தான், நான் உருவாக்கிய பஞ்சகவ்யாவை, ஆரம்ப காலத்தில் விவசாயிகளிடம் கொண்டு சேர்த்ததில் பெரும் பங்கு வகித்தவர். அதை, நானே சொன்னால் சுவையாக இருக்காது. அவரிடமே கேளுங்கள்” என்று செல்லமுத்துவின் முகவரியைக் கொடுத்தனுப்பினார், நடராஜன்.

ஈரோடு மாவட்டம், கொடுமுடியை அடுத்து இருக்கிறது, கருக்கம்பாளையம். வளைந்து நெளிந்து செல்லும் தார்ச்சாலையின் இருபுறமும் வளர்ந்து மணம் வீசும் மஞ்சள் தோட்டங்கள், ஊரைச்சுற்றி ஊர்ந்து செல்லும் காளிங்கராயன் வாய்க்கால், என பசுமை கொஞ்சும் பரிசுத்த பூமி. ‘விர்ர்ர்..’ என்ற ஓசையுடன் ஓடும் விசைத்தெளிப்பானை முதுகில் கட்டிக்கொண்டு மஞ்சள் காட்டுக்கு பஞ்சகவ்யா தெளித்துக் கொண்டிருந்தார், செல்லமுத்து. நம்மை அறிமுகப்படுத்திக் கொண்டதும், தெளிப்பானை இறக்கி களத்துமேட்டில் வைத்து விட்டு, வாய்க்கால் தண்ணீரில் கை, கால் கழுவிவிட்டு பேச ஆரம்பித்தார்.

“எனக்குச் சொந்தமா இருந்தது 40 சென்ட் நிலம்தான். அதை வெச்சி குடும்பம் நடத்த முடியாதுங்கிற நிலையில, பவர் ஸ்பிரேயர் (விசைத்தெளிப்பான்) வாங்கி, வாடகைக்கு பூச்சிக்கொல்லி தெளிச்சிட்டு பொழப்பைப் பாத்துக்கிட்டு இருந்தேன். பயிர்கள்ல, நோய் தாக்கினா, விவசாயிங்க, கூப்பிடுவாங்க. உரக்கடைகள்ல போய் நோய்க்கு ஏத்த மாதிரி பூச்சிக்கொல்லியை வாங்கிட்டு வந்து தெளித்து விடுவேன். நான் தெளித்தது எல்லாம் வீரியமான விஷம். இப்படி, வருஷக் கணக்குல தெளிச்சதுல... எனக்கு சுவாசக்கோளாறு, பக்கவாதம், அலர்ஜினு ஏகப்பட்ட நோய் வந்துடுச்சு. அதுக்கு சிகிச்சை எடுக்கத்தான், டாக்டர்.நடராஜன்கிட்ட போனேன். ‘தினமும் பூச்சிக்கொல்லியோட புழங்கினதுதான் உங்க நோய்க்குக் காரணம். தொடர்ந்து அதையே செய்தால் உயிருக்கே உலைவெச்சிடும்’னு சொன்னார், டாக்டர். ‘எனக்கு வருமானமே அதுதானுங்களே... எப்படி திடீர்னு விட முடியும்’னு கேட்டேன். அப்பதான் ‘நான் வழி சொல்றேன்’னு சொல்லி கலங்கலான திரவம் இருந்த ஒரு பாட்டிலைக் கொடுத்தார்.

மாற்றம் ஏற்படுத்திய மருத்துவர்!

‘இதுக்குப்பேரு பஞ்சகவ்யா. பசுமாட்டில் இருந்து கிடைக்கிற பொருட்களை வெச்சு தயாரிக்கிற கரைசல். இது மண்ணுக்கும் மனுஷனுக்கும் எந்த பாதிப்பையும் உண்டாக்காது. எல்லா பயிருக்கும் இதைத் தெளிக்கலாம்’னு சொல்லி அவர் வீட்டில் இருந்த முருங்கை மரத்தைக் காட்டி, ‘இது, இப்படிக் காய்க்கிறதுக்கு காரணம் பஞ்சகவ்யாதான்’னு சொன்னார். அதை அரை மனசோடு வாங்கிக்கிட்டுப் போய், என்னோட மஞ்சள் வயல்ல, ஒரு லிட்டர் தண்ணிக்கு 300 மில்லிங்கிற அளவுல கலந்து தெளிச்சேன். இன்னொரு நெல் வயல்லயும் சோதனை அடிப்படையில நடவுல இருந்து 15 நாளுக்கு ஒரு முறை தெளிச்சேன். ஆச்சர்யமா, எந்தப் பூச்சிக்கொல்லியும் தெளிக்காம நெல்லு, மஞ்சள் ரெண்டும் தளதளனு வளர்ந்து அதிக மகசூலைக் கொடுத்துச்சு.

வழக்கமா பூச்சிக்கொல்லி தெளிக்க என்னைக் கூப்பிடுற விவசாயிங்களை சோதனை வயல்களுக்குக் கூட்டிட்டுப் போய் காட்டினேன். ‘அட... நெல் வயல்ல நெய்வாசம் வீசுது. மஞ்சள் வயல்ல மணம் வீசுது’னு ஆச்சர்யப்பட்டாங்க. பயிருக்கும் உயிருக்கும் ஏற்ற பாதுகாப்பான மருந்து பஞ்சகவ்யாதான்னு எடுத்துச் சொன்னேன். உடனே, சிலர் மட்டும் ‘எங்க வயல்ல எதை வேணும்னாலும் தெளிங்க... வெள்ளாமை வெளைஞ்சா சரி’னு பஞ்சகவ்யா தெளிக்க அனுமதி கொடுத்தாங்க. சிலர் ‘இந்த வேலையெல்லாம் வேணாம். வழக்கமா தெளிக்கிறதைத் தெளிங்க’னுட்டாங்க.

பஞ்சகவ்யா கரைசல் தயாரிக்கிற விதத்தை டாக்டர்கிட்ட நல்லா கத்துக்கிட்டு, நானே தயாரிக்க ஆரம்பிச்சேன். ரசாயனத்துக்கு மாற்றான ஒரு புரட்சினு கூட இதை எடுத்துக்கலாம். ஒரு விவசாயி, ரெண்டாகி, ரெண்டு மூணாகி, இந்த 18 வருஷத்துல இந்தப் பகுதியில மட்டும் ஆயிரக்கணக்கான விவசாயிங்க பஞ்சகவ்யாவுக்கு மாறி இருக்காங்க” என்று பழைய நினைவுகளில் மூழ்கிய செல்லமுத்து, சற்று ஆசுவாசப்படுத்திக் கொண்டு தொடர்ந்தார்.

அதிகரித்த வருமானம்..!

“ரசாயன பூச்சிக்கொல்லி தெளிக்க ஒரு டேங்க்குக்கு 25 ரூபாய் வாடகை வாங்கினேன். பஞ்சகவ்யா தெளிக்க ஒரு டேங்க்குக்கு 70 ரூபாய் வாங்கினேன். அதுல மகசூல் அதிகம் கிடைக்கவும், பஞ்சகவ்யா அடிக்கச் சொல்லி அதிகமான விவசாயிகள் தேடி வர ஆரம்பிச்சாங்க. அதனால, என்னோட மாத வருமானமும் அதிகமானது. உடம்புக்கும் பாதிப்பும் இல்லை. வாடகை வீட்ல இருந்த நான், இப்ப சொந்த வீடு கட்டி, வாகனம் வாங்கி, குழந்தைகளை நல்லமுறையில் படிக்க வெச்சுக்கிட்டிருக்கேன். பல ஏக்கர் விவசாய நிலத்தை குத்தகைக்குப் பிடிச்சு விவசாயம் பண்றேன். எல்லாமே பஞ்சகவ்யா கொடுத்த கொடைதான்” என்று பெருமிதமாகச் சொன்ன செல்லமுத்து, களத்துமேட்டில் இருந்த விசைத்தெளிப்பானை தோளில் மாட்டிக்கொண்டு வேலையில் மும்முரமானார்.

சிறந்த இயற்கை இடுபொருள் தயாரித்து விவசாயிகளுக்குக் கொடுத்து சேவை செய்தைமைக்காக, முன்னாள் ஜனாதிபதி அப்துல்கலாமிடம் இருந்து, ‘சுற்றுச்சூழல்’ விருதையும், பாராட்டையும் பெற்றுள்ளார் செல்லமுத்து.

-மணம் பரப்பும்

தொடர்புக்கு,
கே.எம்.செல்லமுத்து,
செல்போன்: 94866-02389.

பஞ்சகவ்யாவைப் பரவலாக்கிய நம்மாழ்வார்!

செல்லமுத்து குறித்து அறிந்த நம்மாழ்வார், அவரைப் பாராட்டி விட்டு... தான் செல்லும் இடங்களுக்கெல்லாம் செல்லமுத்துவை அழைத்துச் சென்று, விவசாயிகளுக்கு பஞ்சகவ்யாவை தயாரிக்கும் முறையைக் கற்றுக் கொடுத்தார். கர்நாடக மாநிலம் சென்று அங்குள்ள ஆயிரக்கணக்கான விவசாயிகளுக்கு பஞ்சகவ்யா செய்முறைப் பயிற்சியும் கொடுத்துள்ளார், செல்லமுத்து.

நாட்டுச் சர்க்கரைக்கு பதில் கரும்புச்சாறு!

பசு மாட்டுச்சாணம்-5 கிலோ, மாட்டுச்சிறுநீர்-2 லிட்டர், பால்-2 லிட்டர், நெய்-1 லிட்டர், நாட்டுச்சர்க்கரை-1 கிலோ ஆகியவற்றைப் பயன்படுத்தித்தான் ஆரம்ப காலத்தில் மருத்துவர் நடராஜன் பஞ்சகவ்யா தயாரித்துள்ளார். இருந்தாலும், பயிர்களைப் பொறுத்து மூலப்பொருட்களின் அளவுகளைக் கூட்டிக் குறைத்தும் சில பொருட்களை புதிதாகச் சேர்த்தும் ஆராய்ச்சி செய்து வெற்றி கண்டுள்ளார், செல்லமுத்து. “சர்க்கரைக்கு பதிலாக 3 லிட்டர் கரும்புச்சாறு சேர்த்துக்கிட்டு இலைவழித் தெளிப்பாகக் கொடுக்கும்போது, நல்ல வளர்ச்சி கிடைக்குது” என்கிறார், செல்லமுத்து.

பஞ்சகவ்யா!

இன்றைக்கு இயற்கை விவசாயிகள் பயன்படுத்தும் இடுபொருட்களில் முக்கிய இடம் பிடித்திருப்பது... பஞ்சகவ்யா! இயற்கை விவசாயத்தின் அடிநாதமாக, முழுவேதமாக இருக்கும் பஞ்சகவ்யா, பயிர்களில் ஏற்படுத்திய ஆச்சர்ய மாற்றங்களைப் பார்த்த பிறகே பல விவசாயிகள், இயற்கைக்கு மாறினர். பசுமைப் புரட்சியால் சீரழிந்த நிலங்களை மீட்டுக் கொடுத்ததோடு... இயற்கை விவசாயத்தின் மீது அனைவருக்கும் நம்பிக்கை ஏற்பட வைத்தது, பஞ்சகவ்யாதான். பள்ளிக்கூடம் தொடங்கி பல்கலைக்கழகங்கள் வரை இன்றைக்கு ‘பஞ்சகவ்யா’ என்கிற வார்த்தை வலம் வருகிறது. ‘சாணமும், மூத்திரமும் பயன்படுத்தும் சன்னியாசிகள் விவசாயம் எங்களுக்குத் தேவை இல்லை’ என்று ஆரம்பத்தில் பஞ்சகவ்யாவைப் புறக்கணித்த வேளாண்மைப் பல்கலைக்கழகங்கள்கூட, இன்று பஞ்சகவ்யாவை ஏற்றுக்கொண்டுள்ளன. பஞ்சகவ்யா மூலம் பணக்காரர்களானவர்கள், மாடி வீடு கட்டியவர்கள், பிள்ளைகளை உயர்கல்வி படிக்க வைத்தவர்கள், கார் வாங்கியவர்கள்... என வெற்றி விவசாயிகளின் பட்டியல் நீள்கிறது!

இந்தத் தொடரில் இப்படி வெற்றி பெற்ற விவசாயிகளை, பஞ்சகவ்யாவின் கதையோடு சேர்த்து நாம் பார்க்கப் போகிறோம்.

பாரம்பர்ய விவசாயத்தின் ஆணிவேராகத் திகழ்ந்து வரும் பஞ்சகவ்யாவை மக்களிடம் கொண்டு சேர்க்கவும், அது குறித்து விழிப்பு உணர்வு ஏற்படுத்தவும்... ஆரம்ப காலத்தில் அநேகம் பேர் பாடுபட்டுள்ளார்கள். அவர்களில் முக்கியமானவர், முதன்மையானவர் ‘பஞ்சகவ்யா சித்தர்’ என்று அழைக்கப்படும் ‘கொடுமுடி’ டாக்டர் கே.நடராஜன், எம்.பி.பி.எஸ். காலகாலமாக கோயில்களில் வழங்கப்படும் பக்தி பிரசாதம்தான் பஞ்சகவ்யா. இதை கொஞ்சம் மாற்றி, பாரம்பர்ய விவசாயத்துக்குக் கொண்டு சேர்த்ததில் நடராஜனின் பங்கு அலாதியானது. பஞ்சகவ்யா உருவான விதத்தில் இருந்து, பயன்பாடு வரை பல்வேறு தகவல்களுடன் தனது அனுபவங்களையும் உங்களுடன் பகிர்ந்துகொள்கிறார், டாக்டர்.நடராஜன்.

‘‘ஈரோடு மாவட்டத்துல இருக்கிற கொடுமுடிதான் சொந்த ஊர்.

43 வருஷமா இங்க மருத்துவமனை வெச்சு நடத்திட்டிருக்கேன். 90-கள்ல... பூச்சிக்கொல்லி குடிச்சிட்டு, தற்கொலைக்கு முயற்சி செய்ற கேஸ்கள் என்கிட்ட அதிகமா வந்தது. அதுல பெரும்பாலும் விவசாயக் குடும்பத்தைச் சேர்ந்தவங்கதான் அதிகம். ‘ஏன் இவங்க தற்கொலைக்கு முயற்சி செய்றாங்க?’னு எனக்குள்ள கேள்வி ஓடிக்கிட்டே இருக்கும். சிகிச்சை முடிச்சவங்களை உடனே வீட்டுக்கு அனுப்பாம, ரெண்டு நாள் தங்க வெச்சி... ‘என்ன பிரச்னை, எதனால இந்த முடிவுக்கு வந்தீங்க?’னு கேட்டு, கவுன்சலிங் கொடுப்பேன். சாகுபடி நஷ்டம், கடன் பிரச்னை மாதிரியான காரணங்களைத்தான் எல்லோரும் சொன்னாங்க.

‘ஆடம்பரச் செலவு, சொகுசு வாழ்க்கைனு எந்த வெட்டிச் செலவும் செய்றதில்லை. இருந்தாலும் கடனாளியாக என்ன காரணம்?’னு யோசிச்சப்போ... ரசாயன விவசாயத்துல இருக்கிற செலவுகள்தான் காரணம்னு தெரிஞ்சது. 1960-க்கும் முன்ன 2 சதவிகிதமா இருந்த கிராமப்புறத் தற்கொலைகள், படிப்படியாக உயர்ந்து இன்னிக்கு 18 சதவிகிதத்துல வந்து நிக்குது. முன்னாடி, முழுக்க முழுக்க பாரம்பர்ய விவசாயம் மட்டுமே நடந்துச்சு. தற்சார்பா நடந்த விவசாயத்துல இடுபொருள் செலவு ரொம்ப குறைவா இருந்தது. இன்னிக்கு, உற்பத்திச் செலவு பல மடங்கு எகிறிக்கிடக்குது. ஆனா, அதுக்கேத்த வருமானம் கிடைக்கறதில்லை. ‘இந்த போக நஷ்டத்தை, அடுத்த போகத்தில் ஈடு செய்திடலாம்’ங்கிற நம்பிக்கையிலேயே கடன் மேல கடன் வாங்கி அதைத் திருப்பிக் கொடுக்க முடியாத நெருக்கடியில தற்கொலை முடிவுக்கு வர்றாங்கங்கிற உண்மை புரிஞ்சது.

கருத்தரங்கு காட்டிய வழி!

பாரம்பர்ய விவசாயத்துல மட்டும்தான் விவசாயத்துக்கான செலவுகளை குறைக்க முடியும்னு புரிஞ்சதும், ரசாயன விவசாயத்துக்கான மாற்றுவழி குறித்து யோசிக்க ஆரம்பிச்சேன். இயற்கை வேளாண்மை, மூலிகை மருத்துவம் சம்பந்தப்பட்ட தேடல்ல இறங்கினேன். அதுகுறித்த பல கருத்தரங்குகள்ல கலந்துகிட்டேன். 98-ம் வருஷம் பெங்களூர்ல நடந்த ‘சர்வதேச மூலிகைக் கருத்தரங்கு’ல கலந்துகிட்டேன். அங்க, ‘ஆர்கானிக் ஃபார்மிங் சோர்ஸ் புக்’ங்கிற ஆங்கில புத்தகத்தை வாங்கினேன். அந்தப் புத்தகத்தின் ஆசிரியர், ‘கிளாடு ஆல்வாரிஸ்’.

‘பிரேசில் நாட்டு விஞ்ஞானி ஒருவர், பசுவின் சாணம், மூத்திரம் இரண்டையும் சம அளவு தண்ணீரில் கலந்து,

21 நாட்கள் ஊற வைத்து, அதனுள் இருக்கும் மீத்தேன் வாயு நீங்கியதும், அதனுடன் சில நுண்ணூட்டங்களைச் சேர்த்து... அந்தக் கரைசலில் 20 மில்லியை ஒரு லிட்டர் தண்ணீரில் கலந்து திராட்சைக்குக் குறிப்பிட்ட இடைவெளியில் தெளித்து வந்ததால், பூஞ்சண நோய்த் தாக்குதல் இல்லாமல் திராட்சை விளைந்தது. அதிக மகசூல் கிடைத்ததோடு, பழங்களின் சுவையும் நன்றாக இருந்தது’னு அந்தப் புத்தகத்தில் எழுதியிருந்தார் ஆல்வாரிஸ். அது என் மனதில் ஆழமா பதிஞ்சுது. அதேநேரத்துல இன்னொரு சம்பவமும் நடந்தது. அதுதான் பஞ்சகவ்யாவை விவசாயத்துக்குப் பயன்படுத்துறதுக்கான அடிப்படை வித்தாக மாறிச்சு.

பிரசாதம் தந்த பேருண்மை!

ஒரு சிவராத்திரி அன்னிக்கு, ஊர்ல இருக்கிற சிவன் கோவிலுக்குப் போனேன். பூஜை முடிஞ்சதும், அர்ச்சகர் பிரசாதமா ஒரு திரவத்தைக் கொடுத்தார். ‘இந்தப் பிரசாதத்தினால் என்ன பயன்’னு அவர்கிட்ட கேட்டப்போ, ‘இது, பஞ்சகவ்யா. இதுல 4 மடங்கு பசும்பால், 3 மடங்கு தயிர், 2 மடங்கு நெய், ஒரு மடங்கு பசு மாட்டுச் சிறுநீர், நெல்லிக்காய் அளவு சாண உருண்டைனு 5 பொருட்களைச் சேர்த்து தயாரித்திருக்கோம். இது, பல ஆயிரம் வருஷங்களாக கோவில்கள்ல பிரசாதமாக வழங்கப்பட்டு வருது. இதை சாப்பிட்டா... நோய் எதிர்ப்பு சக்தி கூடும். வந்த பிணி ஓடிப்போகும், வரப்போற பிணியைத் தடுத்து நிறுத்தும்’னார். அவர் சொன்ன வாசகம், என் மனசுல ஒரு பொறியை ஏற்படுத்திச்சு.

பிரேசில் நாட்டு விஞ்ஞானி திராட்சைத் தோட்டத்துக்கு பயன்படுத்தியதையும், அந்தக் கோவில் பிரசாதத்தையும் இணைச்சு பல யோசனைகள் எனக்குள்ள ஓடிச்சு. ‘பஞ்சகவ்யாவை ஏன் பயிர்களுக்குப் பயன்படுத்தக்கூடாது?’ங்கிற யோசனை என்னைத் தூங்க விடலை. அதைத் தயாரிச்சு பரிசோதனை பண்ற வேலைகளை ஆரம்பிச்சேன். என்னோட மருத்துவ அறிவும் அதுக்கு ரொம்ப உதவியா இருந்துச்சு.

ஃபார்முலாவைத் திருப்பிப்போடு!

நான், பசுமாட்டின் சாணம் 5 கிலோ, மாட்டின் சிறுநீர் 3 லிட்டர், பசும்பால் 2 லிட்டர், தயிர் 2 லிட்டர், நெய் ஒரு லிட்டர், நாட்டுச் சர்க்கரை ஒரு கிலோ...னு கலந்து 15 நாட்கள் ஊற வைத்தேன். என்னுடைய வீட்டுத்தோட்டத்துல இருந்த ஒரு முருங்கை மரம், எவ்வளவோ பராமரிச்சும் சரியா காய் பிடிக்காம இருந்தது. அந்த மரத்தில் முதல் பரிசோதனையைத் தொடங்கினேன். 100 லிட்டர் தண்ணீரில் 3 லிட்டர் பஞ்சகவ்யாவைக் கலந்து தெளிச்சேன்.

15 நாள் இடைவெளியில் மறுபடியும் ஒரு முறை தெளிச்சேன். தொடர்ந்து தெளிச்சதால சரம்சரமா அந்த மரத்துல காய் காய்ச்சுது. ஒவ்வொரு முருங்கைக்காயும் நாலடி நீளத்தில பச்சைப் பாம்பு மாதிரி தொங்கிச்சு. அதைப் பார்த்ததும் எனக்கு ஏற்பட்ட ஆனந்தத்துக்கு அளவே இல்லை.

என் தோட்டத்துல ஏற்பட்ட இந்த மாற்றம், அடுத்த சில நாட்கள்ல விவசாயிகள் சிலரோட வயல்களுக்கும் மடை மாறிச்சு.

அந்த ஆச்சர்ய சங்கதிகளை அடுத்த இதழில் பேசுவோம்!

-மணம் பரப்பும்

கொடுமுடி’ டாக்டர்.நடராசன், பஞ்சகவ்யாவைப் பயிர் சாகுபடியில் பயன்படுத்தலாம் என்று கண்டுபிடித்தார். விதைநேர்த்தித் தொடங்கி, நடவு, வளர்ச்சிப் பருவம், பூ மலர்ச்சி, காய்ப் பெருக்கம், அறுவடைக்குப் பின் கெடாமை இப்படிப் பல படிகளிலும் பஞ்சகவ்யாவைப் பயன்படுத்தி ஆராய்ச்சி செய்து ஆவணமாக்கியுள்ளார். அது இந்தியாவின் பல மாநிலங்களிலும் மொழி பெயர்க்கப்பட்டு, பஞ்சகவ்யா பயன்பாட்டுக்கு வந்துவிட்டது.

- “இயற்கை வேளாண் விஞ்ஞானி

தமிழ்நாடு வேளாண் பல்கலைக்கழக விரிவாக்கக் கல்வி இயக்குநர் டாக்டர் வடிவேலுவிடம், பஞ்சகவ்யா குறித்து கேட்டபோது, ‘‘இது அருமையான பயிர் வளர்ச்சி ஊக்கி. பல்கலைக்கழகத்தில் ஆய்வு செய்து அதை உறுதிப்படுத்திக் கொண்டு விட்டோம். பிறகுதான் ‘டி.என்.ஏ.யு. பஞ்சகவ்யா’ என்ற பெயரில் அதை அறிமுகப்படுத்தியுள்ளோம். எங்களின் பல்வேறு ஆராய்ச்சி நிலையங்களிலும் இதைப் பயன்படுத்தி, அதன் மூலம் கிடைக்கும் பலனை உறுதிப்படுத்தியிருக்கிறோம்’’ என்றார்.