மூச்சுகள்

ஒரு மனிதன் ஒரு நிமிடத்திற்கு 15
முறை சுவாசித்தால் அவன் வயது என்ன?

ஒரு மனிதன் ஒரு நிமிடத்திற்கு 15 முறை சுவாசித்தால் அவனுக்கு விதித்த ஆண்டு 100.

{21,600/1440=15. ஒரு நாளுக்கு 1440 நிமிடங்களாகும் (60x24=1440)}

மேற்கண்டவாறு கணக்கிட்டால் ஒரு மனிதன்,

100 ஆண்டுகள் வாழ்ந்தால், அவன்
ஒரு நிமிடத்திற்கு 15 மூச்சுகள் விட்டுள்ளான்,

93 ஆண்டுகள் வாழ்ந்தால், அவன்
ஒரு நிமிடத்திற்கு 16 மூச்சுகள் விட்டுள்ளான்,

87 ஆண்டுகள் வாழ்ந்தால், அவன்
ஒரு நிமிடத்திற்கு 17 மூச்சுகள் விட்டுள்ளான்,

80 ஆண்டுகள் வாழ்ந்தால், அவன்
ஒரு நிமிடத்திற்கு 18 மூச்சுகள் விட்டுள்ளான்,

73 ஆண்டுகள் வாழ்ந்தால், அவன்
ஒரு நிமிடத்திற்கு 19 மூச்சுகள் விட்டுள்ளான்,

66 ஆண்டுகள் வாழ்ந்தால், அவன்
ஒரு நிமிடத்திற்கு 20 மூச்சுகள் விட்டுள்ளான்...

இவ்வாறு நிமிடத்திற்கு ஒவ்வொரு மூச்சு கூடும்போதும் நாம் நம் ஆயுளில் 7 வருடங்களை இழக்கிறோம் என்பதனை கவனத்தில் கொள்ளவேண்டும்.

2 முறை சுவாசித்தால் அவன் வயது 750 ஆண்டு
1 முறை சுவாசித்தால் அவன் வயது 1500 ஆண்டு
0 முறை சுவாசித்தால் முடிவேயில்லை (இது சித்தர்களால் மட்டுமே முடியும்)  - வலைதளத்தில் காணக் கிடைத்தது  அன்புடன்  நூர்தீன்

கமல்ஹாசன் என்னும் சினிமா யானை!

எப்போது பார்த்தாலும் கண் விலகாமல் ஆச்சர்யம் தரும் யானை, ரயில், அருவி, குழந்தை போல எனக்கு ஆச்சர்யம் தரும் இன்னொரு விஷயம் கமல். பார்வையற்றவன் யானையின் உருவத்தை சொல்ல முயற்சித்தது போல முயற்சி செய்திருக்கிறேன் 

தமிழ் சினிமா 75-ல் இருந்து 80-களின் பெரும்பகுதி வரை 'கரகர' கரம் மசாலாவாகவே இருந்தது. இதில் பாலச்சந்தர், பாரதிராஜா போன்றவர்கள் நல்ல படங்களை கொடுத்துக்கொண்டிருந்தார்கள். எம்.ஜி.ஆர்., சிவாஜி போன்ற சினிமா சீனியர்களின் ஓய்வுக்கு பிறகு தமிழ் சினிமாவில் மசாலா மணத்தை குறைக்க முற்பட்டதில் முதலிடம் கமலுக்கு கொடுக்கலாம். ரஜினிக்கு மிகப்பெரிய புகழை பெற்றுத்தந்த 'முள்ளும் மலரும்' மூலமாக பாலுமகேந்திராவை தமிழுக்கு கொண்டு வந்தது கமல் என்பது பலருக்கும் தெரியாத செய்தி. அதுவரை டாக்கியாக இருந்த சினிமாவை மூவியாக மாற்ற முயற்சித்தவர்கள் மகேந்திரன், பாலுமகேந்திரா. அவர்களை ஒத்த அலைவரிசையில் இருந்தவர் கமல். "கமல் மலையாள படங்களில் பிசியாக நடித்து கொண்டிருந்தபோதே தமிழ் சினிமாவின் நிறத்தை மாற்றும் எண்ணம் இருந்தது. இத்தனைக்கும் அப்போது அவர் வயது 25க்குள் இருந்தது" என எழுத்தாளர் சுஜாதா கூறியிருக்கிறார்.

கமல் ஆரம்ப காலத்தில் ரொமான்டிக் ஹீரோவாக இருந்தாலும், பின்பு ஆக்சனுக்கும் மாறியவர்தான். நிறைய மசாலா படங்கள் மூலம் வெற்றியை சுவைத்தவர்தான். 'குரு', 'சகலகலா வல்லவன்' அதில் சிகரம் என சொல்லலாம். தன்னுடைய 100வது படமான 'ராஜபார்வை'யில் நடித்தபோது கமலின் வயது 25. தன்னுடைய 100வது படம் என்பது ரிஸ்க் இல்லாமல் வெற்றி படமாக இருக்க வேண்டும் என்றுதான் எல்லா ஹீரோக்களும் விரும்புவார்கள். (இதில் விதிவிலக்காக ஜெயித்தவர்கள் எம்.ஜி.ஆர்., சிவாஜி, விஜயகாந்த் ஆகியோர்தான். ரஜினி, சத்யராஜ், பிரபு எல்லோருக்கும் 100வது படம் தோல்விப்படங்களே). கமல் சினிமாவின் நிறத்தை மாற்றவேண்டும் என்ற ஆர்வத்தில் தெரிந்தே 'ராஜபார்வை' என்ற தீயில் கையை வைத்தார். "ராஜபார்வைக்காக விருது வாங்கியபோது மட்டும்தான் கை 'ஜில்' என்று இருந்தது" என கமல் குறிப்பிட்டார்.

கமலும் சகலகலா வல்லவன், தூங்காதே தம்பி தூங்காதே மூலம் உச்சபட்ச வெற்றியை சுவைத்தார். ஆனால், அதில் சிக்கிக்கொள்ளாமல் எழுத்தாளரை சினிமாவுக்கு கொண்டு வரவேண்டும் என்ற ஆவலில், சுஜாதாவுடன் இணைந்து எடுத்த படம்தான் 'விக்ரம்'. எனக்கு தெரிந்து கம்ப்யூட்டர் முதன்முதலில் காண்பிக்கப்பட்டது விக்ரமில்தான். ஏவுகணையின் ஆபத்தை தமிழர்கள் அறிய செய்த படம். 'ப்ளூ மேட்' டெக்னாலஜியில் உருவான முதல் தமிழ்ப்படம். ராஜஸ்தானுக்கு தமிழர்கள் சுற்றுலா சென்றுவந்தது போல் அழகாக படம் பிடிக்கபட்ட படம். சத்யராஜ் வில்லனாக நடித்த கடைசி படம் என பல விஷயங்கள் இதில் உண்டு. இயக்குனர் ராஜசேகர் இடையில் மாவீரனை இயக்க போய்விட சந்தானபாரதியும், கமலும் செய்த 'பேட்ச் ஒர்க்' படத்துக்கு செட்டாகவில்லை. இதனால் விக்ரம் தோல்விப்படமாக அமைந்தது. அதுவரை  நடித்து சம்பாதித்த அனைத்து பணத்தையும் அதில் போட்டிருந்தார் கமல் என்ற தகவலும் உண்டு. 'மன்னாதி மன்னன்' தோல்வி அடைந்திருந்தால் என்னவாகியிருக்குமோ, அது கமலுக்கு நடந்தது எனத்தகவல். ஆனாலும், வித்தியாசமான முயற்சிகளை விடவில்லை.

தொடர்ந்து பிசியாக நடிக்க வேண்டிய சூழல், இல்லையென்றால் 'பேர் சொல்லும் பிள்ளை'யும், 'மங்கம்மா சபதமும்' வந்திருக்காது. கமலின் பேனா கமர்சியல் வெற்றி பெற்றது 'அபூர்வ சகோதரர்கள்' படத்தில்தான். மூன்று வேடங்கள், மூன்று பாடி லாங்குவேஜகள் என கமல் தன்னை வருத்தி ரசிகனை குதூகலப்படுத்திய படம். கிரேசி மோகன், கமலுக்கு 'பக்கா'பலம் ஆனார். அப்பு கேரக்டருக்கு கமல் பட்ட சிரமங்கள் ஏராளம். அதில் பின்புறமாக கால்களை கட்டிக்கொண்டு நடித்ததும் ஒன்று. அதில் அப்பு கேரக்டரை சற்று மனநிலை பாதித்தவனாக காட்டியிருந்தாலும் கூட (வில்லன் படம் மாதிரி) இந்த படம் வெற்றி பெற்றிருக்கும். ஏனெனில் திரைக்கதை அவ்வளவு நன்றாக இருந்தது. இப்படி மெனகெட்டிருக்க தேவையில்லை. ஆனால், ரசிகனுக்கு புதிய விஷயத்தை கொண்டு சேர்க்க வேண்டும் என்பதற்காக கமல் அவ்வளவு மெனக்கெட்டார் என்பதுதான் நிதர்சனம். கமல், அபூர்வ சகோதர்கள் வரையிலும்,  ரஜினி, பாட்ஷா வரையிலும் ரசிகர்கள் தங்களை எப்போது வேண்டுமானாலும் வீட்டில் உட்காரவைத்து விடுவார்கள் என்ற மனநிலையில் இருந்தார்கள் என்பது தகவல். சிவாஜியையே ஒதுக்கியவர்கள் அல்லவா தமிழர்கள்.

கமல் 90க்கு  பிறகு தன் பாதையை மாற்ற எடுத்த முதல் முயற்சிதான் 'குணா'. குணா மனநிலை பாதிக்கபட்டவன், அவனது தாய் தப்பான தொழில் செய்பவள். இதற்குமுன் எந்த பெரிய ஹீரோவும் தன்னுடைய பின்புலத்தை இவ்வளவு மோசமாக அமைத்து கொண்டதில்லை. கமல் - இளையராஜா - சந்தானபாரதி என்ற கூட்டணி வெற்றி தராமல் போனாலும், தமிழுக்கு மற்றொரு வாசல் திறந்த படம் குணா. கமல் பேனா பிடித்த படங்களின் திரைக்கதையில் ஒரு ஒழுங்கு இருக்கும். அதில் இரண்டாம் படம் தான் குணா. இவ்வளவு மெனக்கெடல் ஒரு படத்துக்கு வேண்டுமா என ரசிகனை பேசவைத்தது. அதுவரை வெறும் 'பைத்தியம்' என்ற உச்சரித்த தமிழ் சினிமா 'மனநிலை பாதிக்கப்பட்டவன்' என்ற சொல்லை உபயோகிக்க காரணமாயிருந்தது குணாதான்.

அது செல்வராகவன் காதல் கொண்டேன் செய்யுமளவுக்கு வந்து நின்றது. கமல் குணாவாகவே மாறி உலவினார். ஒரு அறைக்குள்ளேயே கமல் சுற்றி சுற்றி வசனம் பேசும்போது தமிழ்சினிமாவும் சுற்றியது. அதுவரை இருந்த ஸ்டேண்டிங் காமிராக்களுக்கு விடுதலை. குணா குகைக்கு (முன்பு டெவில்ஸ் கிச்சன்) போகும் வழி மிகவும் ஆபத்தானது. ஒவ்வொருவராக பாலத்தில் சென்று அந்த இடத்தை அடைவார்களாம். கரணம் தப்பினால் மரணம் என்ற நிலையில் கமல் அதில் சென்று நடித்தார். ஆனாலும், அது அப்படியொரு இடத்தில் படமாக்கபட்டது ரசிகனுக்கு தெரியாது. கடைசி ரசிகனுக்கும் நியாயம் செய்யவே அப்படி ஓர் இடத்தை தேர்ந்தெடுத்து சிரமத்துடன் நடித்தார். அதனால்தான் ராஜாவின் 'கண்மனி அன்போடு காதலன்'க்கு நியாயம் செய்ய முடிந்தது. இதுதான் எல்லா இளையராஜா ரசிகனின் ப்ளே லிஸ்ட்டிலும் கண்மனி இடம் பிடிக்க காரணம். 

கமலின் பேனாவுக்கு வைரைக்கல் வைத்த படமென்றால் 'தேவர் மகன்' தான். அன்னை இல்லத்து ராஜா நீண்ட இடைவெளிக்கு பிறகு அரிதாரம் பூசியதற்கு அதுவரை அவர் பெறாத சம்பளத்தை கொடுத்தார் கமல். (படையப்பாவில் ரஜினி அதை முறியடித்தார்.) பொதுவாக கமல், ரஜினி நடிக்கும் படங்களில்தான் மற்ற நடிகர்களுக்கு சரியான சம்பளம் கிடைக்கும் என்ற தகவலும் உண்டு. குருதிப்புனலில் இயக்குனர் விஸ்வநாத்துக்கு சம்பளம் ரூ.85 லட்சதுக்கு மேல் கொடுத்தார் என்பது தகவல். கமல் தன்னை சிறந்த தயாரிப்பாளராகவும் நிலைநிறுத்திக் கொண்டவர். தேவர் மகன் மூலம் 'ஃபங்க்' ஸ்டைலை அறிமுகம் செய்து வைத்தார். அனைத்து நாயகர்களின் ரசிகர்களும் கூட பேதமின்றி 'ஃபங்க்' வைத்துக்கொண்டார்கள். பொதுவாக கமல் ஸ்டைல் செய்யமாட்டார். செய்தால் அது வெகுநாளைக்கு இருக்கும். உதாரணம், 'சத்யா' பட ரிங் இப்போது வரை காலேஜ் பசங்ககிட்ட கூட டிரெண்ட்.

தமிழ்சினிமாவின் சிறந்த பத்து படங்களை சொன்னால் அதில் தேவர் மகனை சேர்க்காமல் முடியாது. தேவர்மகனில் சிவாஜி இருக்கும் காட்சிகளில் கமல் அடக்கியே வாசித்தார். சிவாஜி என்ற பிதாமகனை வேறொரு கோணத்தில் காட்டி ரசிக்க வைத்தார். தேவர்மகனின் வசனங்கள் இன்றும் பாடமாக படிக்க வேண்டியவை. தமிழ் சினிமாவின் சிறந்த வசனங்களை உள்ளடக்கிய படங்களில் ஒன்று. திரைக்கதை என்ற இலக்கணத்துக்கு சரியான உதாரணம். தெற்கில் இருக்கும் ஜாதி வெறியை, பெரியவர், சின்னவர் என்ற பேதத்தை, சொத்து பிரச்சனையை, அந்த பகுதி மக்களின் வெள்ளந்திதனத்தை கண்ணாடிபோல் காட்டியது திரைக்கதை. சங்கிலி முருகன் அதற்கு உதவினார். சிவாஜியின் 'இன்னைக்கு  நான் விதை போடுறேன்' வசனம் மனித வாழ்வில் பாடமாக படிக்க வேண்டிய ஒன்று. 'போய் புள்ளகுட்டிகள படிக்க வைங்கடா' என்று சொல்லி தமிழர்களை விழிக்க செய்தார். தலைவாசல் விஜய், வடிவேல் போன்ற திறமையாளர்களை அடையாளம் காட்டினார். எனக்கு பிடித்த கமலின் 'எவர் கிரீன் மூவி' என்றால் அது 'தேவர்மகன்'தான்.

தேவர் மகனுக்கு பிறகு கமல் மீதான மரியாதை கூடிய படம் 'மகாநதி'. கிருஷ்ணசாமியாக கமல் வாழ்ந்தார். பெண்களுக்கு எதிரான அக்கிரமங்களை, அநீதிகளை வெளிச்சமிட்டு காட்டிய படம். 'சோனாகாஞ்சி' என்ற வார்த்தையை கடைசி தாய்மாருக்கும் கொண்டு போய் சேர்த்தார். ஒரு தவறான தொழில் செய்யும் பெண்ணின் காலில் விழுந்து அழுது தன்னுடைய நட்சத்திர அந்தஸ்த்தை உடைத்து 'தான் ஒரு நடிகன் மட்டுமே' என்று கமல் ஊருக்கு உணர்த்தினார். சகமனிதனின் கோபம் என்ன செய்யும் என காட்டினார். எனக்கு தெரிந்து பெண்களோடு சேர்ந்து, ஆண்களும் கண்ணீர் சிந்தியபடி பார்த்தபடம் 'மகாநதி' தான். அதில் முதன்முதலில் 'ஆவிட்' எனும் கம்ப்யூட்டர் எடிட்டிங்கை தமிழ் சினிமாவுக்கு அறிமுகம் செய்தார். புதுமையை தமிழ் சினிமாவில் புகுத்திக்கொண்டேயிருக்க வேண்டும் என விரும்பினார். இந்த யானையை பற்றி எழுதும்போது அன்பே சிவம், ஹேராம் இரண்டையும் எழுதாமல் இருக்க முடியாது. ஆனால் அதை தொட்டால் இந்த கட்டுரைக்குள் அடக்க முடியாது. அதற்கென ஒரு பதிவு எழுதனும்.

சில படங்கள் காலங்கள் கடந்தபோதும் பார்க்குறப்ப எல்லாம் அப்டியே ஃப்ரெஷ்ஷா இருக்கும். சில படங்கள் சில காலம் கழித்து கொண்டாடப்படும். ஆனால், வந்த புதிதில் வரவேற்பை பெறாமல் போயிருக்கும். இதில் 'விக்ரம்', 'மைக்கேல் மதன காமராஜன்', 'பம்மல் கே.சம்பந்தம், 'பஞ்ச தந்திரம்', 'தில்லு முல்லு', 'அன்பே சிவம்' போல பல படங்கள் உண்டு. அதில் ஒன்றுதான் 'ஆளவந்தான்'. மனப்பிறழ்வை மிக வித்தியாசமான கோணத்தில் பதிவு செய்த படம். அதில் வரும் நந்துவின் கவிதைகள் வீரியம் மிக்கவை (உபயம் வைரமுத்து). நந்து வந்தவுடன் படத்தின் நிறம் மாறும், வேகம் வேகம், பாடல் இசைக்கு சங்கர் எசான் லாய், பின்ணனி இசைக்கு மகேஷ் என கமலின் புதிய படை தங்கள் பங்கை சரியாக செய்தார்கள். கமல் வில்லனுக்கென எந்த காம்பரமைஸும் செய்துகொள்ளாமல், நந்துவுக்கு தோன்றுவதையே திரைக்கதையாக அமைத்தார். இடைவேளைக்கு பிறகான படத்தின் வேகம் சமீபத்தில் கூட எந்த படத்திலும் பார்த்த நியாபகம் இல்லை.

2000ஆம் ஆண்டு தீபாவளிக்கு வந்த தெனாலிக்கு கொடுத்த வரவேற்பை, 2001ஆம் ஆண்டு தீபாவளிக்கு வந்த ஆளவந்தானுக்கு மக்கள் ஏன் கொடுக்கவில்லை என்று இன்றும் தெரியவில்லை. பெண்கள் பலருக்கு கமல் நிர்வாணமாக அமர்ந்திருந்த, படுத்திருந்த போஸ்டரே படத்துக்கு செல்ல தேவையில்லை என்ற எண்ணத்தை ஏற்படுத்த போதுமானதாக இருந்தது. அந்த சமயத்தில் கமல் பெர்சனல் வாழ்வில் வந்த பிரச்னைகளும் படத்தின் மைலேஜை குறைத்தது. கமலஹாசன் உடைகள் 'சாய்' என டைட்டிலில் வந்தது. கலைப்புலி தாணுவே போதுமான விளம்பரம் கொடுத்ததாக தெரியவில்லை. தாணு கமலை விமர்சித்து, அவரே தியேட்டர்களில் எடிட்டும் செய்தார். "பெண்ணை கட்டி கொடுத்தாச்சு இனி நல்லபடியா பார்த்துக்குறதும், கொடுமைபடுத்துறதும் அவங்க கையில இருக்கு" என கமல் பேட்டிகளில் வருத்தப்பட்டார். கமல் மீதான் கோபத்தை கமல்-சரிகா விவாகரத்துக்கு பிறகு 'புன்னகை பூவே' படத்தில் சரிகாவை ஒரு பாடலுக்கு ஆட வைத்து தாணு காட்டிக்கொண்டார். கமல் செய்த ஒரே தவறு ஆளவந்தானை 2001-ல் ரிலீஸ் செய்ததுதான்.2 015-ல் எடுத்து ரிலீஸ் செய்திருந்தால் ப்ளாக்பஸ்டர் ஹிட் அடித்திருக்கும். இதற்கு லார்ட் ஆப் த ரிங்க்ஸ் தயாரிப்பாளர் பேரி ஆஸ்பர்னின் பாராட்டே உதாரணம்.

கமலுக்கும், இளையராஜாவுக்குமான நட்பு மிக ஆச்சர்யம் அளிக்ககூடிய ஒன்று. 2005க்கு பிறகு இருவரும் இணைந்து பணியாற்றவில்லை. ஆனாலும், அவர்களின் நட்பு அப்படியே இருக்கிறது. இளையராஜாவின் லண்டன் இசை விழாவில் ஒரு பாடகனாக கலந்து கொண்டு பாடினார். இளையராஜாவுக்கும், கமல் கொஞ்சம் ஸ்பெஷல்தான். ஏனெனில், இளையராஜாவின் பாடல்களுக்கு அதிகபட்ச நியாயம் செய்து படமாக்கியதில் கமலுக்கு மட்டுமே முதலிடம்  

கமல் ஹாலிவுட் படங்களை காப்பியடிக்கிறார் என்று சொல்கிறார்கள். நல்ல விஷயங்களை, மக்கள் அறிந்திராத விஷயங்களை நெருக்கமாக கொண்டு வர உதவி புரிகிறார் என்றே சொல்ல வேண்டும். அவ்வை சண்முகி 'என் மீசையானாலும் மனைவி'தான்னு கிரேசி மோகன் பலமுறை சொல்லியும் இது மிஸஸ் டவுட் பயர்-தான் என்று சொல்கிறார்கள். அப்படியே பார்த்தாலும் ஆண்-பெண் புரிந்துகொள்ளலை சேர்ந்து வாழவேண்டிய அவசியத்தை, மிக நகைச்சுவையாக சொன்னதில் அவ்வை சண்முகி, ஆங்கில படத்தை விட நன்றாகவே இருந்தது. கமல் நல்ல இந்தியப் படங்களையும் விட்டதில்லை. மராட்டி 'துரோக்கால்'தான் 'குருதிப்புனல்' ஆனது. 'சத்யா' கூட ரீமேக்தான். அது இப்ப 'பாபநாசம்' வரை தொடர்கிறது.

இந்த யானையின் பிடித்த முகங்களில் ஒன்று ரசிகன் முகம். சிவாஜி, நாகேஷ், அவ்வை சண்முகம், எம்.ஆர்.ராதா, பாலச்சந்தர் என அவர் ரசிக்கும் விஷயங்களும், அதை இப்போது சொல்லும்போதும் காட்டும் ஆர்வமும், ரசிக்க தகுந்த ஆச்சரியப்படக்கூடிய ஒன்று. சமீபத்தில் சுகாசினி ஒரு நிகழ்ச்ச்சியில் கமலிடம் "வீரபாண்டிய கட்டபொம்மன், கப்பலோட்டிய தமிழன் படங்களை ரீமேக் செய்து நடிக்க சொன்னால் எந்த படத்தில் நடிப்பீர்கள்" என கேட்டதற்கு, கமலின் பதில், "எந்த கேரக்டரில்ன்னு சொல்லவே இல்லையே" என்றவர், “வேண்டுமானால் கப்பலோட்டிய தமிழன் படத்தில் சுப்ரமணிய சிவாவாக நடிக்கலாம். ஏன்னா அதுல என் ஆசான் சண்முகம் அண்ணாச்சி நடித்திருந்தார்" என பதில் சொன்னார். அவர் சிவாஜிக்கும், அவர் இடத்துக்கும் கொடுக்கும் மரியாதை பிரமிக்க தகுந்த ஒன்று. இத்தனைக்கும் சிவாஜி கடைசி வரை கமலை தன் வாரிசாக அறிவிக்கவே தயங்கினார் என்பதே உண்மை. சிவாஜி தன் நடிப்புலக சக்கரவர்த்தி எனும் நாற்காலியை யாரிடமும் பங்கு போட்டுக்கொள்ள விரும்பவில்லை தேவர்மகன் நாற்காலி உட்பட.

நாகேஷ் - இன்று வரை கமல் எந்தவொரு தொலைக்காட்சி பேட்டியிலும் நாகேஷை குறிப்பிடாமல் பேசியதாக நியாபகம் இல்லை. நாகேஷ் குறித்து சொல்லும்போதெல்லாம் 200% எனர்ஜியாக சொல்லுவார். இன்னும் கூட கண்கள் விரிய, விரிய நாகேஷ், பாலச்சந்தர் நட்பை விவரிப்பார். கமலின் தற்போதைய உயரத்துக்கு இந்த அளவுக்கு சக நடிகனை ரசிப்பதை வெளியில் காட்டிக்கொள்ளவேண்டிய அவசியம் இல்லை. ஆனாலும், ரசிப்பதில் குறை வைப்பவரல்ல கமல். கமல் தன் படங்களில் நாகேஷை தொடர்ந்து பயன்படுத்தி அன்பை காட்டினார். அவ்வை சண்முகி ஜோசப், அபூர்வ சகோதர்கள் வில்லன், பஞ்ச தந்திரம் மாமனார், நம்மவர் புரபசர், மகளிர் மட்டும் பிணம், வசூல் ராஜா வாத்தியார், அப்பா என கமல் நாகேஷுக்கு கொடுத்த வைரைட்டிகள் அதிகம். தசாவதாரத்தில் கமல் நாகேஷுக்கு கொடுத்தது கவுரவ 'செண்ட் ஆப்'. 'ஐ அம் ஹானர்டு'டா என நாகேஷ் கமலை பார்த்து சொன்னார். தன் விருப்ப நடிகரின் கடைசிப்படம் தன் படமாக மாறிப்போனதில் கமல் நிச்சயம் சந்தோசப்பட்டிருக்கமாட்டார்.

கமலுக்கு கடவுள் பக்தி இல்லை. ஆனால் குரு பக்தி நிறைய உண்டு. பாலச்சந்தரின் மீது கமல்ஹாசனின் மரியாதை வியக்கதக்க ஒன்று. இந்த விசயத்தில் கமல், ரஜினி இருவரும் நேர்க்கோட்டில் இருப்பார்கள். சமீபத்தில் ஒரு நிகழ்ச்சியில் கமல் சொன்னார், "பாலச்சந்தர் காரில் வந்துகொண்டிருந்தபோது, இந்த படத்தில் யாரை நடிக்க வைக்கிறது. ரோட்டுல போறவனையா?'' என பாலச்சந்தரிடம் ஒருவர் கேட்க, அவர், ''ரோட்டுல போற அவன்தான் நடிக்க போறான்'' என்று பாலச்சந்தர் சொன்ன இடத்தில் நடந்து சென்று கொண்டிருந்தது நான். நல்லவேளை அந்த பக்கம் நான் நடந்து போனேன்" என குறிப்பிட்டார். கமல் பாலச்சந்தரின் இயக்கத்தில் கடைசியாக நடித்தபடம் 'உன்னால் முடியும் தம்பி' என்றாலும் கூட, 'பார்த்தாலே பரவசம்' படத்தில்கூட ஒரு சீன் வந்து தன் குரு பக்தியை காட்டினார். உத்தமவில்லனில் பாலச்சந்தரை நடிக்க வைத்து குருபக்தியை காட்டினார். உத்தமவில்லன் பாலசந்தரின் கடைசி படமாக அமைந்தது இயற்கையின் சொல்

கமல், ரஜினி நட்பும் ஆச்சரியம் அளிக்கும் ஒன்றுதான். ரஜினி 80க்கு பிறகு துறவறம் மேற்கொள்ள முயற்சித்தபோது, அவரை மீண்டும் லௌகீக வாழ்க்கைக்கு அழைத்துவர முயற்சித்ததில் பெரும்பங்கு கமலுக்கு உண்டு. கமல்-சிம்ரன் பிரச்னையில் ரஜினி தலையிட்டு தீர்த்து வைத்தார் என்ற தகவலும் உண்டு. ரஜினி 'தெனாலி' என தலைப்பு வைக்க, படையப்பாவுக்கு ஒரு இடைவேளை மட்டுமே விடவேண்டும் என கமல் முடிவு செய்ய என இருவரது நட்பும் மிக ஆச்சரியமிக்க ஒன்று.

கமல்ஹாசன் படங்கள் என்றாலே 'லிப் கிஸ்' என எழுதுவதில் அதிக ஆர்வம் கொண்டவர்கள் சினிமா விமர்சகர்கள். உண்மையில் அதுபோல அமைந்தது சில படங்களே. அதுவும் காட்சிக்கு தேவைப்பட்டிருக்கும் ஹேராம், மகாநதி, குருதிப்புனல், புன்னகை மன்னன் என சில படங்களில் மட்டுமே வரும். இப்போது யோசித்தால் அடுத்து வரும் காட்சிக்கு தேவையானதாகவே இருக்கும். தேவர் மகனுக்கு பிறகு கமலின் படங்களில் சமூகப்பொறுப்பு அதிகமாகவே இருந்தது. திருமண பந்தத்தில் நம்பிக்கை இல்லாத கமல், இதுவரை அதற்கு முரணான படங்களில் நடித்ததில்லை. மும்பை எக்ஸ்பிரஸ்ல் வரும் மனீஷாவின் கேரக்டர் உதாரணம். அவ்வளவு தவறான குணங்களுடைய பெண்ணை மனைவியாக ஏற்றுக்கொண்டு மனிதர்கள் அனைவரும் குறையுடையவர்கள்தான். நாம்தான் அனுசரித்து நல்வழிப்படுத்தி வாழவேண்டும் என சொல்லாமல் சொன்னார். கிளைமேக்ஸில் எங்க போறோம் என்பதற்கு 'நேர் வழியில' என பதில் சொன்னார். தொடர்ந்து வேட்டையாடு விளையாடு-வில் ஜோதிகாவை இரண்டாம் திருமணம் செய்துகொள்வார். இதில் கமல் முரண்பட்டிருந்தால் கௌதம்மேனன் மாட்டேன் என சொல்லியிருக்கமாட்டார். ஆண், பெண் மறுமணத்துக்கான் அழகான கவிதை அது. 

புத்தங்களை படிக்கவேண்டும் என வலியுறுத்துபவர். 'நீங்களும் வெல்லலாம் ஒரு கோடி' நிகழ்ச்சியில் ஜெயமோகனின் 'அறம்' புத்தகத்தை, பிரகாஷ்ராஜுக்கு பரிசாக தந்ததனால் 'அறம்' அனைவரும் அதிகளவில் படிக்கும் புத்தகம் ஆனது. நீங்களும் வெல்லலாம் ஒரு கோடியில் கிடைத்த பரிசுத்தொகை 50 லட்சத்தைக்கூட 'பெற்றால்தான் பிள்ளையா' அறக்கட்டளைக்கு கொடுத்து தன் சமூகப்பொறுப்பை காட்டினார். அவருடைய நற்பணி இயக்கங்கள் செய்துவரும் நற்பணிகள் ஏராளம். பாபநாசம் படப்பிடிப்பில் கூட அந்த பகுதி சமூக ஆர்வலர்களை தேடிப்போய் சந்திக்கிறார். கமலின் பிளஸ் என்பது வெற்றியோ, தோல்வியோ எதிலும் தேங்கிவிடாமல் ஆற்று நீரைப்போல் நிற்காமல் ஓடிக்கொண்டிருப்பதுதான். பாபநாசம் வெற்றியை கொண்டாடிக் கொண்டிருக்காமல் 'தூங்கவனம்' முடித்து விட்டார்.       

தற்போதைய தமிழ் சினிமாவில் 1965க்கும், 2015க்கும் இடையிலான தமிழ் சினிமாவின் அப்டேட்டட் அறிவுப்பாலமாக இருப்பது கமல் மட்டுமே. சில குறைகள், சில விமர்சனங்கள் இருந்தாலும் தமிழ் சினிமாவின் உண்மையான கதாநாயகன் கமல் மட்டுமே.

யெஸ் தி ரியல் 'ஆளவந்தான்'!

மாடித்தோட்டத்தில் விளையும் பன்னீர் திராட்சை!

விஷம் இல்லாத காய்கறிகளை வீடுகளிலேயே உற்பத்திச் செய்துகொள்ளும் வகையில் பலர் தங்கள் வீட்டின் மாடிகளிலோ, ஒதுக்குபுறங்களிலோ காய்கறிகள், பழங்களை உற்பத்தி செய்து வருகிறார்கள். அதில் ஒருவர்தான் இந்த மாடித்தோட்ட விவசாயி செல்வராஜ். 

 ‘பாடிய வாயும் ஆடிய காலும் சும்மா இருக்காது’ என்பார்கள். அதுபோலதான் விவசாயமும். கடும் வறட்சி காரணமாக வயலெல்லாம் காடாகிக் காய்ந்து போய்க் கிடக்கும் நிலையில்... ‘தன் வீட்டு மொட்டை மாடியையே திராட்சைத் தோட்டமாக்கி விவசாயத்தைத் தொடர்கிறார், ஒரு விவசாயி’ என்ற தகவல், நம்மை வந்தடைந்தது. 

 திண்டுக்கல் மாவட்டம், வேடசந்தூர் தாலூகா, சித்தூர் பஞ்சாயத்து, புளியம்பட்டியைச் சேர்ந்தவர் செல்வராஜ். அவரைச் சந்திப்பதற்காகப் பயணமானோம். வேடசந்தூர்-எரியோடு சாலையில் பூத்தாம்பட்டி என்ற ஊர் எல்லையில், வடக்குத் திசையில் பிரியும் தார் சாலையில் இரண்டு கிலோ மீட்டர் பயணித்தால் வருகிறது, புளியம்பட்டி. போகும் வழியில் விவசாயத்தையே பார்க்க முடியவில்லை. கடுமையான வறட்சியில் நிலமெல்லாம் பாளம் பாளமாக வெடித்துக் கிடக்கின்றன. நீண்ட நாட்களாக பயன்பாடு இல்லாததால் துருப்பிடித்துக் கிடக்கின்றன, பம்ப்செட் மோட்டார்கள். 

 

சுமார் 100 வீடுகளே இருக்கும் சின்ன கிராமம். கோயிலை ஒட்டிய சிமென்ட் பாதையில் குறுகலான சந்தில் இருக்கிறது, செல்வராஜின் வீடு. வீட்டு வாசலில் இருக்கும் மல்லிகைச் செடியை கவாத்து செய்து கொண்டிருந்தவரைச் சந்தித்து, திராட்சைத் தோட்டம் பற்றிக் கேட்டதும் ஆர்வமானவர், மாடிக்கு அழைத்துச் சென்றார். மொட்டை மாடியில் வெயிலே தெரியாத வகையில் பசுமைப் போர்வை போர்த்தி இருந்தது, பன்னீர் திராட்சைப் பந்தல்.

 

உள்ளே கொத்துக்கொத்தாகத் தொங்கிக் கொண்டிருந்தன திராட்சைப் பழங்கள். திராட்சைத் தோட்டத்துக்குள் நுழைந்த பிரமிப்பில் இருந்த நம்மிடம் ஒரு கொத்தை நீட்டி, ‘‘சாப்பிட்டுப் பாருங்க” எனக் கொடுத்து விட்டு, பேசத் தொடங்கினார், செல்வராஜ்.

 ஏமாற்றிய மழை!

 

 ‘‘எங்களுக்குப் பரம்பரையா விவசாயம்தான் தொழில். அப்பா காலத்துல நல்லபடியாத்தான் சம்சாரித்தனம் பண்ணிட்டிருந்தோம். ஒரு காலத்துல முருங்கை, நெல்லு, கடலைனு பெருங்கொண்ட விவசாயம் நடந்துகிட்டிருந்த ஊருதான். இடையில, மழை தண்ணியில்லாம கெணறுக வத்திப்போச்சு. எங்க ஊர்ல நல்லா மழை பேஞ்சி ஏழெட்டு வருஷமாச்சு. காசு, பணம் இருக்கறவங்க போர் போட்டு வெள்ளாமை பண்ணுனாங்க. என்ன மாதிரி இல்லாதவங்க, கெணத்தை அப்படியே போட்டுட்டு கூலி வேலைக்குக் கிளம்பிட்டோம். உழவு ஓட்டுறது, பிளம்பிங், கொத்தனார், கம்பி கட்டுறதுனு கிடைக்கிற வேலைக்குப் போயி பொழப்பை ஓட்டிக்கிட்டு இருக்கேன். 

 

சின்ன வயசுல இருந்தே எனக்கு மரம் வளர்க்குறதுல ரொம்ப ஆர்வம். வீட்டைச் சுத்தி மாதுளை, மல்லிகைனு நட்டு வளர்த்துகிட்டு இருந்தேன். எங்கயாவது வெளியூருக்குப் போனா, அங்க இருந்து ஏதாவது கன்னை வாங்கிட்டு வந்து நட்டு வளர்ப்பேன். ஆறு வருஷத்துக்கு முன்னகூட கேரளாவுக்கு கூலி வேலைக்குப் போயிட்டு வரும்போது, கொஞ்சம் கன்னுகளை வாங்கிட்டு வந்து ஊர் எல்லையில இருக்கும் கோவில் பக்கத்துல நட்டு வெச்சிருக்கேன். ஆல், அரசு, புங்கன் மாதிரியான மரங்களோட நாத்துகளை வாங்கிட்டு கொஞ்சம் பெருசா வளர்த்து கோவில்களுக்கு இலவசமா கொடுத்துடுவேன்.   

 

 

 

கற்றுக்கொடுத்த விவசாயிகள்!

 

என் வீட்டம்மா, வேலைக்குப் போற வீட்ல ரெண்டு திராட்சைக் கொடிகள் நட்டு வெச்சிருந்ததைப் பாத்துட்டு வந்து சொன்னாங்க. உடனே எனக்கும் திராட்சை நடணும்னு ஆர்வமாகிடுச்சு. அந்த வீட்டுல போய் பார்த்தேன். அப்பறம் திண்டுக்கல் மாவட்டத்துல, திராட்சை அதிகமா விளையுற சின்னாளபட்டி பக்கத்துல இருக்க ஊத்துப்பட்டியில போயி சில விவசாயிங்களோட தோட்டங்களைப் பாத்தேன். திராட்சை நடவு, பராமரிப்பு, கவாத்துனு எல்லாத்தையும் சொல்லிக் கொடுத்தாங்க. சாகுபடி முறைகளைத் தெரிஞ்சுகிட்டு, அவங்ககிட்டயே முப்பது குச்சி வாங்கிட்டு வந்து பிளாஸ்டிக் பையில வெச்சு வளர்த்து நடவு போட்டேன்” என்ற செல்வராஜ், இவற்றை வளர்த்தெடுக்க கொஞ்சம் மெனக்கெடத்தான் செய்திருக்கிறார்.

 

10 செடிகளில் படர்ந்த பந்தல்!

 

“வீட்டைச் சுத்தி ரெண்டடிதான் இடமிருக்கு. மாடியில திராட்சை பந்தல் போட்டுக்கலாம். ஆனா, மாடியில செடியை நட முடியாது. தொட்டிகள்ல வெச்சாலும் வேர் பெருசானா தொட்டி தாங்காது. என்ன பண்ணலாம்னு யோசிச்சு, வீட்டைச் சுத்தி செடியை நட்டு, கயிறு மூலமா மாடிக்கு கொடியை ஏத்தி, பந்தல்ல படர விட்டேன். பந்தல் அமைக்கறதுக்கு பழைய இரும்புக் குழாய்களை பயன்படுத்தியிருக்கேன். இதுக்கு 15 ஆயிரம் ரூபாய் செலவாச்சு. ஆரம்பத்துல ரொம்ப கஷ்டப்பட்டுட்டேன். இப்ப கொத்துக்கொத்தா பழங்களைப் பாக்கும்போது, அந்த கஷ்டமெல்லாம் காணாமப் போயிடுச்சு. இதை நட்டு ரெண்டு வருஷமாச்சு. இப்ப என்கிட்ட 10 செடிகள் இருக்கு. அதுகளோட கொடிதான் மாடியில படர்ந்திருக்கு. வருஷத்துக்கு ஒரு தடவை 10 கிலோ கடலைப்பிண்ணாக்கை வாங்கி தண்ணியில கரைச்சு, செடியோட வேர்கிட்ட ஊத்துவேன். காய் பிடிக்குற நேரத்துல ஒரு பூச்சி வரும். அதுக்கு மட்டும் கடையில பூச்சிக்கொல்லி வாங்கித் தெளிப்பேன். இதுபோக வேற எதையும் கொடுக்குறதில்ல.

 

300 கிலோ மகசூல்!

 

இதுவரைக்கும் மூணு தடவை பழம் வெட்டியிருக்கோம். 800 சதுர அடியில மாடி இருக்கு. அதுல 600 சதுர அடியில பந்தல் இருக்கு. முதல் தடவை 70 கிலோ கிடைச்சது. அடுத்த தடவை 130 கிலோ. இந்தத் தடவை இதுவரைக்கும் 150 கிலோவுக்கும் மேல எடுத்திட்டோம். இன்னும் 150 கிலோ கிடைக்கும்னு நினைக்குறேன். செலவுனு பாத்தா வருஷத்துக்கு 1,500 ரூபாய் ஆகும். இந்தப் பழங்களை விலைக்குக் கொடுக்கறதில்லை. வீட்டுத்தேவை போக, சொந்தக்காரங்களுக்கும், ஊர்ல இருக்க சின்னப் பசங்களுக்கும் இலவசமா கொடுத்திடுவேன்.

 

அதுபோக, அணில், காக்கா வந்து தின்னுட்டுப் போகும். அதை நான் தடுக்கறது இல்லை. அதுக தின்ன மீதிதான் நமக்கு” என்ற செல்வராஜ், “மொதல்ல, வெவசாயம் பாக்காம, பைத்தியம் பிடிச்ச மாதிரி இருக்கும். இந்தத் தோட்டம் போட்ட பின்னாடி, அந்த நினைப்பு இல்லை. காலையில, சாயந்திரம்னு எப்ப ஓய்வு கிடைச்சாலும் மாடிக்கு வந்திடுவேன். இதையும் தோட்டமா நினைச்சுத்தான் பாத்துகிட்டு இருக்கேன்” என்று சொன்னபோது, அவருடைய மனதில் குடிகொண்டிருக்கும் மகிழ்ச்சியை நன்றாகவே உணர முடிந்தது! 

தொடர்புக்கு :

செல்வராஜ், செல்போன் : 96557-35497

......................................

மொட்டை மாடி சாகுபடி!

மாடியில் திராட்சை சாகுபடி குறித்து செல்வராஜ் சொன்ன விஷயங்கள் இங்கே... 

 

“வீட்டைச் சுற்றி 5 அடி இடைவெளியில் 4 அடி அகலம், 2 ஆழத்துக்கு  குழியெடுக்க வேண்டும். ஒவ்வொரு குழியிலும் ஒரு சிமெண்ட் சாக்கு அளவு மணல், ஒரு சிமெண்ட் சாக்கு அளவு குப்பை எருவைக் கொட்டி, செடியை நடவு செய்து மேல் மண்ணைக் கொண்டு குழியை மூடவேண்டும். தொடர்ந்து செடியைக் காய விடாமல் தண்ணீர் கொடுத்து வந்தால், செடி தழைத்து வளரும். 2 இலைக்கு அடுத்து ஒரு சிம்பு வெடிக்கும். இதை நகத்தால் கிள்ளி எடுத்துவிட வேண்டும். செடி வளரும் பருவத்தில் சிம்பு கிள்ளி விடுவதில் கவனமாக இருக்க வேண்டும். ஓரளவுக்கு வளர்ந்த பிறகு, கயிறு மூலமாகக் கொடியை மாடிக்கு ஏற்ற வேண்டும். கொடியின் முனையில் கயிற்றை நேரடியாக கட்டக் கூடாது. பிளாஸ்டிக் கவரை கிழித்து கயிறு போல் ஆக்கி, அதைக் கொடியின் முனையில் மென்மையாகக் கட்ட வேண்டும். மறுமுனையை கயிற்றுடன் இணைக்க வேண்டும்.

 

..................................

“பஞ்சகவ்யா இருக்க பூச்சி மருந்து எதற்கு?”

 

பூச்சிகளுக்கு இயற்கை தீர்வு குறித்து, திண்டுக்கல் மாவட்ட, திராட்சை சாகுபடி முன்னோடி இயற்கை விவசாயி ஜானகிராமனிடம் கேட்டோம்... “கவாத்து செய்து முடித்தவுடன், 10 லிட்டர் தண்ணீரில் 200 மில்லி பஞ்சகவ்யா கலந்து தெளித்தாலே போதும். எந்தப் பூச்சி, நோயும் தாக்குவதில்லை.

 

கடலைப்பிண்ணாக்கு விலை அதிகம் என்பதால், கடலை பிண்ணாக்கு 50%, புங்கன் பிண்ணாக்கு 20%, ஆமணக்கு பிண்ணாக்கு 20%, வேப்பம் பிண்ணாக்கு 10% கலந்து ஊற்றலாம். மாடித்தோட்டத்துக்கு இதைப் பின்பற்றினாலே போதும். இயற்கை முறையில் நன்றாக திராட்சையை விளைய வைக்கலாம்” என்றார்.

தொடர்புக்கு :

ஜானகிராமன், 91500-09998

 

 நன்றி ,விகடன்

இவரைப் பற்றி ஆச்சர்யமான தகவல்

உலகின் இரண்டாவது பெரிய பணக்கார மனிதரான "வாரன் பப்பட்" (Warren Buffet ) பற்றி சில சுவாராசியமான தகவல்கள் 

1. அவர் முதல் பங்கு (share) வாங்கியது அவரின் 11 வயதில்.... அதுவே தான் தாமதமாக வாங்கியதாக பிற்காலத்தில் அவர் தெரிவித்தார்....

2. 14 வயதிலேயே தனது சுய சம்பாத்தியத்தில் சின்ன பண்ணை வீடு ஒன்றினை அவர் வாங்கினார்.....அப்பணம் அவர் பேப்பர் டெலிவரி செய்ததில் சம்பாதித்து, சேமித்த பணம் 

3. இன்று வரை 3 படுக்கை அறை கொண்ட சாதாரண வீட்டிலேயே அவர் குடியிருந்து வருகின்றார்..அவ்வீட்டிற்கு சுற்றுச் சுவரோ அல்லது வேலியோ இல்லை

4. அவராகவே அவர் காரை எங்கும் ஓட்டிச் செல்வார்.... டிரைவர் மற்றும் பாதுகாப்புக்கென ஆட்கள் யாரும் கிடையாது

5. அவர் இதுவரை எங்கும் தனி விமானத்தில் பயணித்தது கிடையாது. .. உலகின் பெயர்பெற்ற, பெரிய‌ விமான கம்பெனிக்கு சொந்தக்காரர் அவர்....

6. அவரின் சொந்த கம்பெனிகள் மொத்தம் 63. வருடம் ஒரு முறை மட்டுமே கம்பெனியின் தலைமை பொறுப்பாளர்க்கு ( CEO) கடிதம் எழுதுவார்.... இடைப்பட்ட எந்தவொரு மீட்டிங் மற்றும் சந்திப்புகளும் இருக்காது.... அந்த கடிதத்தில் கம்பெனியின் அடுத்த இலக்கை குறிப்பிட்டு இருப்பார்.....

7. கம்பெனி பொறுப்பாளர்க்கு இரண்டு விதிகளை மட்டும் குறிப்பிடுவார் ..... அது

(அ) பங்குதாரர்களின் பணத்தை நஷ்டமடைய செய்யக் கூடாது
(ஆ) முதலாவது விதியை மறக்க கூடாது

8.அவரைச் சுற்றி எப்போதும் ஒரு உயர்தர சமூகத்தினரின் கூட்டம் இருக்காது....அவரின் ஓய்வு நேரத்தில் அவர்க்குத் தேவையான பாப் கார்னை வீட்டில அவரே தயார் செய்து சாப்பிடுவார், டிவி பார்ப்பார்....

9. அவரிடம் எந்தவொரு செல் போனோ அல்லது மடிக் கண்ணியோ வைத்திருக்க மாட்டார்....

10. உலகின் முதல் பணக்காரரரான பில் கேட்ஸ் சில வருடங்களுக்கு முன் இவரை சந்திக்க‌ , இருவருக்கும் பொதுவான எதுவும் இல்லையென்று எண்ணி முதலி வெறும் 30 நிமிடங்கள் மட்டுமே வாரன் பப்பட் டை சந்திக்க 
நேரம் ஒதுக்கியிருந்தார்... ஆனால் சந்தித்த பொழுது, அந்த சந்திப்பு பத்து மணி நேரங்களுக்கும் மேலாக நடைப்பெற்றது 

எளிமையின் மனிதரான வாரன் பப்பட் நமக்கு சில அறிவுரைகளைச் சொல்கின்றார்....... அவை : 

1. பணம் மனிதனை படைக்கவில்லை ஆனால் பணத்தை படைப்பவனை மதிக்கின்றது 

2. உங்கள் வாழ்க்கையினை எளிமையாகவும், எளிதாகவும் வாழுங்கள் 

3. அடுத்தவர்கள் சொல்வதை செய்யாதீர்கள். மற்றவர்கள் சொல்வதை கேளுங்கள் ஆனால் உங்களுக்கு சரியெனப் படுவதை நீங்கள் செய்யுங்கள்

4. புகழ்பெற்ற கம்பெனியினை (brand names) பின்பற்றாதீர். உங்களுக்கு வசதியானதை வாங்கி பயன்படுத்துங்கள்......

5. பணத்தை தேவையற்ற காரியங்களை வாங்கி வீணாக்காதீர்

6. உனது வாழ்க்கை....நீயே விதிகளை தீர்மாணி, அடுத்தவரை உன் வாழ்க்கையினை தீர்மானிக்க அனுமதிக்காதே........

தினசரி வருமானத்துக்கு ‘நாட்டு’ எலுமிச்சை…

திருநெல்வேலிக்கு அல்வா என்றால், புளியங்குடிக்கு ‘எலுமிச்சை’தான் அடையாளம். அந்தளவுக்கு இந்த ஊரின் சுற்று வட்டாரப் பகுதிகளில் எலுமிச்சை சாகுபடி அதிகளவில் நடக்கிறது. இப்பகுதிகளில் உள்ள மண் மற்றும் தட்பவெப்ப சூழ்நிலை எலுமிச்சை சாகுபடிக்கு மிகவும் ஏற்றதாக உள்ளது. கரும்பு, நெல் ஆகியவையும் இப்பகுதிகளில் விளைந்தாலும், தினசரி வருமானம் தரும் எலுமிச்சையையே இங்கு பணப்பயிராகக் கருதுகிறார்கள். எலுமிச்சைக் கன்றுகளை குழந்தைகளைப் போல பராமரிக்கும் இப்பகுதி விவசாயிகள், எலுமிச்சைத் தோப்புக்குள் செருப்புகூட அணிந்து செல்வதில்லை. அமாவாசை, பௌர்ணமி போன்ற முக்கிய விரத நாட்களில் எலுமிச்சைத் தோப்புக்கு சாம்பிராணி காட்டும் அளவுக்கு, தெய்வமாகவும் போற்றுகிறார்கள்!

லெமன் சிட்டி!

இப்பகுதியின் ‘முன்னோடி இயற்கை விவசாயி’ அந்தோணிசாமியிடம் எலுமிச்சை பற்றிப் பேசினோம். ”இந்த ஏரியாவுக்கு புளியங்குடிதான் முக்கியமான எலுமிச்சைச் சந்தை. கிட்டத்தட்ட 60 கிலோ மீட்டர் தூரத்துல இருந்துகூட இங்க எலுமிச்சை வரும். ராஜபாளையம், சுரண்டை, கடையம், அம்பாசமுத்திரம், தென்காசி, செங்கோட்டை, பண்பொழி, கடையநல்லூர், வாசுதேவநல்லூர் மற்றும் கோவில்பட்டினு கிட்டத்தட்ட இருபத்தைந்தாயிரம் ஏக்கர்ல நாட்டு எலுமிச்சை சாகுபடி நடக்குது. இதுல, புளியங்குடியில் மட்டும் பத்தாயிரம் ஏக்கர்ல நடக்குது. அதனாலதான், இந்த ஊரை ‘லெமன்சிட்டி’ங்கிறாங்க. மத்த ஊர் பழங்களைவிட இந்த ஊர் எலுமிச்சைக்கு நல்ல கிராக்கி இருக்கு. இது, அளவுல பெரிசா இருக்கும். அதிக சாறு வரும். பறிச்சதுல இருந்து 5 நாள் கழிச்சுதான் பழுக்கும். ரொம்ப நாள் வரை தாக்குப் பிடிக்கும். அதனால் போக்குவரத்துக்கும், வெச்சு விக்கிறதுக்கும் ஏதுவா இருக்கும். இதெல்லாம்தான் இத்தனை கிராக்கி இருக்கிறதுக்குக் காரணம்” என்ற அந்தோணிசாமி, சாகுபடி செய்யும் முறையைச் சொன்னார். அது இங்கே பாடமாக…

20 அடி இடைவெளி!

”20 அடி இடைவெளியில் 3 அடி ஆழம் மற்றும் 3 அடி அகலம் இருக்கும்படி குழிகள் தோண்ட வேண்டும். ஒரு ஏக்கருக்கு 90 முதல் 100 குழிகள் வரை தோண்டலாம். ஒவ்வொரு குழியிலும்

15 கிலோ திருகுக்கள்ளியைப் போட்டு, அதன் மீது 20 கிலோ கொழிஞ்சி, ஆவாரை இலைகளைப் போட வேண்டும். பிறகு, 30 கிலோ தொழுவுரம், 2 கிலோ வேப்பங்கொட்டை, 1 கிலோ மண்புழு உரம் ஆகியவற்றைப் போட்டு, 25 நாட்களுக்கு அப்படியே வைக்க வேண்டும் (கொழிஞ்சி, ஆவாரை, திருகுக்கள்ளி போடமுடியாதவர்கள்… தொழுவுரம், மண்புழு உரம் மட்டும் போடலாம்). பிறகு, குழியின் நடுவில் ஒன்றரை அடி ஆழத்துக்குத் தோண்டி எலுமிச்சை நாற்றை நடவு செய்ய வேண்டும். சொட்டு நீர்ப்பாசனம் அமைத்தால், மகசூல் சீராக இருக்கும். கன்று நடவு செய்த 10 நாட்கள் வரை, கன்றின் மூட்டைச் சுற்றி தினமும் காலால் மிதித்துவிட வேண்டும். போதுமான அளவுக்குத் தொடர்ந்து தண்ணீர் பாய்ச்சி வர வேண்டும்.

15 ஆண்டுகள் வருமானம்!

40 முதல் 45 நாட்களில் புதுத் தளிர்கள் வரும். அந்த நேரத்தில் வண்ணத்துப்பூச்சிகளின் தாக்குதல் இருக்கலாம். 10 லிட்டர் தண்ணீரில் 1 லிட்டர் மாட்டுச் சிறுநீர், 100 மில்லி வேப்பெண்ணெய் ஆகியவற்றைக் கலந்து தெளிப்பான் மூலமோ அல்லது வேப்பிலை மூலமோ செடிகளின் மீது தெளித்தால், வண்ணத் துப்பூச்சிகள் வராது. 20 நாட்கள் இடைவெளியில் இக்கரைசலைத் தொடர்ந்து தெளிக்க வேண்டும். ஆண்டுக்கு இரண்டு முறை மரத்தின் மூட்டில் இருந்து, ஓர் அடி தள்ளி 20 கிலோ ஆடு அல்லது மாட்டு எரு, 1 கிலோ மண்புழு உரம் ஆகியவற்றைக் கலந்து வைக்க வேண்டும். வேறு எந்தப் பராமரிப்பும் தேவையில்லை. இரண்டாம் ஆண்டில் இருந்து காய்கள் காய்க்கத் தொடங்கும். தொடர்ந்து, 15 ஆண்டுகள் வரை காய்க்கும்.’

சாகுபடிப் பாடம் முடித்த அந்தோணிசாமி, ”ஒரு மரத்துல இருந்து வருஷத்துக்கு சராசரியா 300 காய் வரை கிடைக்கும். எங்க ஊர்லயே சந்தை இருக்கிறதால, விற்பனைக்குப் பிரச்னையில்லை. சொல்லப்போனா, எலுமிச்சைக்குனு தனி மார்க்கெட் இங்கதான் இருக்கு. தமிழ்நாடு மட்டுமில்லாம ஆந்திரா, கர்நாடகா, கேரளானு இங்கிருந்து எலுமிச்சை போகுது. திருவனந்தபுரத்துல இருந்து வெளிநாடுகளுக்கு ஏற்றுமதியாகுது. பழத்தோட அடிப்படையில மூன்று ரகமா பிரிச்சு விலை வெப்பாங்க” என்றவர், நம்மை எலுமிச்சைச் சந்தைக்கு அழைத்துச் சென்றார்.

சைக்கிள், பைக், தள்ளுவண்டி என மூட்டை, மூட்டையாக எலுமிச்சை வந்து இறங்கிக்கொண்டே இருக்க… திரும்பியப் பக்கமெல்லாம் எலுமிச்சை ஏலம் நடந்து கொண்டேயிருக்க… எலுமிச்சை மார்க்கெட் துணைத்தலைவர் திருமலைசாமியிடம் பேச்சுக் கொடுத்தோம்.

”முப்பது வருஷத்துக்கு முன்ன எல்லாரோட வீட்டுலயும், தோட்டத்துலயும் எலுமிச்சை காய்க்கும். வீடு வீடா போயி, ‘எலுமிச்சை இருக்கா?’னு கேட்டு, பேரம் பேசி மூடை போடுவோம். அதுல நிறைய சிக்கல்கள் இருந்துச்சு. அப்பறம்தான், புளியங்குடி மெயின் பஜார்ல எலுமிச்சைக்காக சந்தை ஏற்படுத்தலாம்னு விவசாயிகள் கேட்டாங்க. 89-ம் வருஷம், சின்ன அளவுல கூரை செட் போட்டு ஆரம்பிச்சோம். அப்பறம் 30 கடைகள் வந்துருச்சு. இங்க திறந்தவெளி ஏலம்தான்.

மூடை கட்டி வர்ற எலுமிச்சைகளைக் கொட்டி பரப்பி ஏலம் விடுவோம். பருமன், நிறத்தை வெச்சு விலை கேப்பாங்க. நூத்துக்கு பத்து காய் சேர்த்து மூடை பிடிக்கணும். அப்பதான், பொட்டுக்காய், சொத்தைக்காய், வெம்பியக்காய்னு கழிக் கிறப்போ சரியா இருக்கும். ஏலம் விட்டதும் காய்களை எண்ணித்தான் மூடை போடுவோம். எடை கணக்குலயும் காய் ஏலம் விடலாம்.

சனிக்கிழமை தவிர, வாரம் முழுக்க சந்தை உண்டு. சாதாரணமா காலையில 11 மணிக்கு ஆரம்பிச்சு, சாயங்காலம் 3 மணிக்கு ஏலம் முடியும். சீசன் சமயங்கள்ல சாயங்காலம் 5 மணி வரைக்கும்கூட நடக்கும். ஜனவரி மாசத்துல இருந்து ஜூன் மாசம் வரைக்கும் சீசன். இதுல, ஏப்ரல் கடைசியில இருந்து, ஜூன் வரைக்கும் உச்சக்கட்ட சீசன். இந்த சமயத்துல, ஒரு நாளைக்கு 80 லாரி லோடு வரை (8 லட்சம் கிலோ அளவு) வரும். மத்த சமயங்கள்ல தினமும் 20 ஆயிரம் கிலோ வரத்து இருக்கும்” என்றார்.

புளியங்குடி, முகைதீன் அப்துல் காதர், ”30 வருசமா 6 ஏக்கர்ல எலுமிச்சை விவசாயம் செய்றேன். மொத்தம் 600 மரம் இருக்குது. சராசரியா ஒரு நாளைக்கு 120 கிலோவுல இருந்து 180 கிலோ வரை சந்தைக்குக் கொண்டு வருவேன். ஒரு கிலோ 50 ரூபாய்ல இருந்து, 60 ரூபாய் வரை விலை போகுது. தினமும் குறைஞ்சது 6 ஆயிரம் ரூபாய்க்குக் காய் போடுவேன். இதுல பத்து சதவிகிதம் கமிஷன் போக 5 ஆயிரத்து 400 ரூபாய் கையில கிடைக்கும்” என்றார்.

திருவேட்டைநல்லூர், பெருமாள், ”நினைவு தெரிஞ்ச நாள்ல இருந்தே எலுமிச்சை சாகுபடிதான். 4 ஏக்கர்ல எலுமிச்சை இருக்கு. நான், எண்ணிக்கை முறையிலதான் விற்பனை செய்றேன். சாதாரண சமயத்துல 1 ரூபாய்ல இருந்து, 1 ரூபாய் 50 காசு வரைக்கும் ஒரு பழத்துக்கு விலை கிடைக்கும். சீசன் சமயத்துல 3 ரூபாய்ல இருந்து, 5 ரூபாய் வரை கிடைக்கும். போன சீசன்ல 7 ரூபாய் அளவுக்கு விலை கிடைச்சுது. எடையைவிட எண்ணிக்கை முறைதான் லாபமா இருக்கு. தினசரி வருமானம், உடனடிப் பணம், திறந்தவெளி ஏலம், அதனால விக்கிறவர், வாங்குறவர் ரெண்டு பேருக்குமே நஷ்டம் இல்லை” என்றார்.

தொடர்புக்கு,
திருமலைச்சாமி, செல்போன்: 94435-55936, அந்தோணிசாமி, செல்போன்: 99429-79141 முகைதீன் அப்துல்காதர், செல்போன்: 99409-26911 பெருமாள், செல்போன்: 94424-90253

---

சேதி கேட்டீங்களா!

சொட்டு நீர்க்குழாய் அடைப்புக்குத் தீர்வு!

சொட்டு நீர்ப் பாசனத்தில் விவசாயம் செய்யும் அத்தனை விவசாயிகளுக்கும் இருக்கும் முக்கியமான பிரச்னை சொட்டு நீர்க் குழாய்களில் உப்பு அடைப்பு. இதை சரி செய்வதற்கு சொட்டு நீர் கம்பெனியைச் சேர்ந்தவர்கள் ‘சல்பியூரிக் ஆசிட்’டைதான் பயன்படுத்தச் சொல்கின்றனர். அந்த ஆசிட் பயிர்களில் படும்போது, பயிர் கருகி போய்விடுகிறது. இந்தப் பிரச்னைக்கு இயற்கை முறையில் தீர்வு இதோ…ஒரு ஏக்கர் நிலத்தில் இருக்கும் சொட்டு நீர்க் குழாய்களுக்கு 20 லிட்டர் தண்ணீரில், 10 லிட்டர் மாட்டுச்சிறுநீரைக் கலந்துகொள்ள வேண்டும். பாசனம் செய்து முடிப்பதற்கு 15 நிமிடங்களுக்கு முன்பு, உரம் செலுத்தும் குழாய் வழியாக இந்தக் கரைசலைச் செலுத்தி, ஐந்து நிமிடம் மட்டும் ஓடவிட்டு மோட்டரை நிறுத்திவிட வேண்டும். மீண்டும் 24 மணி நேர இடைவெளி கொடுத்து, எல்லா கேட் வால்வுகளையும்  திறந்துவிட்டு பாசனம் செய்தால், சொட்டு நீர்க் குழாயில் இருக்கும் அடைப்புகள்  முழுக்க வெளியேறிவிடும்.

இதெல்லாம் இருந்தா... நீங்களும் பணக்காரர்தான்..!

பணம். இன்றைய அத்தியாவசிய தேவை என்பதை யாராலும் மறுக்க முடியாது.  எல்லோரிடமும் அது இருக்கிறது. ஆனால் எல்லோரையும் பணக்காரர் என்று சொல்வதில்லையே, ஏன்?

அதோ போறார் பாரு, பெரிய பணக்காரரு...! என்று சொல்லும்போது நாம் ஏன் பணக்காரர் என்று அழைக்கப்படுவதில்லை என்று யோசித்திருக்கிறோமா? இல்லை. அது காலம் காலமாய் யாரோ ஒருவருக்கு எழுதி வைத்தது போல், நாமெல்லாம் எங்கே பணக்காரர் ஆவது என்ற மனநிலையிலேயே எல்லோரும் வாழ்ந்துகொண்டிருக்கிறோம். அதை விட முக்கியமாகப் பலருக்கு பணக்காரர்கள் மீதிருக்கும் தவறான புரிதலும் ஒரு காரணம்.

இப்படி நினைக்கும்  உங்களைப் பணக்காரராக மாற்றும் அட்டகாசமான சில குணாதிசயங்கள் உள்ளன. இவற்றை வளர்த்துக்கொண்டால் நீங்களும் பெரிய பணக்காரர் ஆகலாம்.

1. காசு... பணம்... துட்டு... மணி

பணம் பற்றி தெளிவான புரிதல் இருந்தாலே போதும், அந்தப் புள்ளியிலேயே நீங்கள் பணக்காரர் ஆகிவிடுவீர்கள். பணம், வாங்க விற்க உதவும் ஒரு ஊடகம். ஆனால் அது பார்க்கப்படும் விதமே அதற்கான மதிப்பாக மாறுகிறது. முதலில் பணம் நம்மையும் நம்மை சுற்றி இருப்பவர்களையும் மகிழ்ச்சியாக வைத்திருக்க வேண்டும்.  
 

2. ஆசையும், விருப்பமும்

அத்தனைக்கும் ஆசைப்படு என்பார்கள். உங்கள் ஆசை பணக்காரனாக வேண்டும் என்றில்லாமல். அது தரும் மதிப்பின் மீதான ஆசையாக இருக்கட்டும். ஒரு விஷயத்தை விரும்பினாலொழிய உங்களால் அதில் ஈடுபாட்டுடன் செயல்பட முடியாது. பணக்காரர்கள் பொதுவாக தாங்கள் விரும்பியதையே செய்வார்கள். விரும்பிய ஒரு விஷயத்தைச் செய்யும்போது, அதில் கிடைக்கும் சுதந்திரம் மட்டுமல்லாது அதன் மீதான நம்பிக்கையையும் மேலும் வளர்க்கும். பிடிக்காத வேலையையும் செய்பவர்கள் சாமானியர்கள், பிடித்ததை மட்டுமே செய்பவர்கள் பணக்கார்கள்.
 

3. உழைப்பும் தெளிவான அறிவும்

பணத்தைப் பெருக்க, ஆசை மட்டும் இருந்தால் போதாது, அதற்காக கடுமையாக உழைக்கவும் தயாராக இருக்க வேண்டும். தாங்கள் இயங்கும் துறையில் தெளிவான அறிவை வளர்த்துக்கொள்ள வேண்டும். அறிவும், உழைப்பும், வாய்ப்புகளுடன் ஒன்று சேரும்போதே நம்மால் வளர்ச்சியை நோக்கி முன்னேற முடியும்.
 

4. கையாள்வதும், பெருக்குவதும்:

கடுமையாக உழைத்து கோடி கோடியாக பணத்தை சம்பாதித்து விட்டீர்கள்... இப்போது நீங்கள் பணக்காரரா? என்றால், இல்லை. அந்தப் பணத்தைக் கையாளத் தெரிந்திருந்தால் மட்டுமே நீங்கள் பணக்காரர். அதாவது பணத்தை சரியான இடத்தில் சரியான அளவில் முதலீடு செய்யவும் செலவு செய்யவும் தெரிந்திருக்க வேண்டும். அதே சமயம் சிறு சேமிப்பும் அவசியம். ஒரு பணக்காரன் சாதாரண சாமான்யனிடமிருந்து இங்குதான் வேறுபடுகிறான். 

5. எண்கள் மட்டுமே இலக்கல்ல:

பணக்காரர்கள் என்றாலே, எப்போதும் பணத்தை எண்ணிக்கொண்டும், தங்கள் நிகர சொத்து மதிப்பில் உள்ள பூஜியங்களைப் பார்த்துக்கொண்டும் இருப்பார்கள் என்று எண்ணுவது தவறு. எண்களையெல்லாம் தாண்டி சிந்திப்பவர்களால் மட்டுமே வளர்ச்சியை நோக்கி செல்ல முடியும். இல்லையென்றால் தேங்கிக் கிடக்க வேண்டியதுதான். அதனால் தொடர்ந்து தங்களுடைய அறிவை, பார்வையை மேம்படுத்திக்கொண்டே இருக்க வேண்டும். 

6. பயத்தை விட்டு தள்ளுங்கள்

பயம், எல்லோருக்கும் இருக்கும். நாம் என்னதான் வெளியில் நெஞ்சை நிமிர்த்திக்கொண்டு திரிந்தாலும் நாம் எதற்கு பயப்படுகிறோம் என்பதை நன்கு தெரிந்திருப்போம். அந்தப் பயத்தை மூட்டை கட்டி விட்டு இலட்சிய பயணத்தைத் தொடருங்கள். பயம் ஒருபோதும் தடையாக இல்லாமல் பார்த்துக்கொள்ளுங்கள். அதற்கான தன்னம்பிக்கையை மனதில் ஏற்றிக்கொள்ளுங்கள்.
 

7. தெளிவான உறுதியான இலக்கு

இலக்கு தெளிவாக இருந்தால் மட்டுமே அதை நோக்கிய சரியான பாதையை நம்மால் தேர்ந்தெடுக்க முடியும். பணக்காரர்கள் எப்போதும் உறுதியான தெளிவான இலக்குகளை வைத்து கொள்வார்கள். அந்த இலக்கை அடையும் எண்ணம் மட்டுமே அவர்கள் மனதில் ஒவ்வொரு நிமிடமும் இருக்கும். அதற்காகத் தொடர்ந்து பாடுபடுவார்கள். இலக்கை நிர்ணயித்து விட்டு, அதை மறந்துவிடுபவர்கள் வெற்றி பெரும் வாய்ப்பை இழக்கிறார்கள்.
 

8. கொஞ்சம் சுயநலம்

இலட்சியப் பயணத்தை நோக்கி செல்பவர்கள் கொஞ்சம் சுயநலமாகவும் இருக்க வேண்டும். எல்லோருக்காகவும் கவலைப்பட்டால், இலக்கை அடைவது தாமதமாகலாம். சரியான நேரத்தில் சரியான முடிவுகளை எடுங்கள். தேவையற்ற விஷயங்களுக்கு தைரியமாக 'நோ' சொல்லி விடுங்கள். உங்களுடைய வேலைகளை முதலில் முடித்துவிடுங்கள். பிறர் கூறுவதையெல்லாம் எண்ணி கவலை படாமல், இலக்கை நோக்கிப் போய்க்கொண்டே இருங்கள். 
 

9. உதவி செய்யும் முன்

பணம் கையில் இருந்தாலே, கூட்டம் கூடிவிடும். கடன், அன்பளிப்பு, பரிசு என பல வகைகளில் பணத்தைக் கேட்டு வரிசையில் நிற்பார்கள். அவர்களில் எல்லோருமே நியாயமானவர்களாக இருப்பார்கள் என்று சொல்ல முடியாது. அதனால் வள்ளல் போல வாரி வழங்காமல், கொஞ்சம் யோசித்து சரியான பயனாளியை அடையாளம் கண்டு, அதற்கு பின் உதவி செய்யுங்கள். 
 

10. ஆரோக்கியம் மிக முக்கியம்

உயிரோடு இருந்தால்தான் பணத்தை சம்பாதிக்கவும், சம்பாதித்த பணத்தை அனுபவிக்கவும் முடியும். பணம், பணம் என்று உடல்நலத்தைக் கெடுத்துக் கொண்டால் அனைத்தையும் இழக்க வேண்டியதுதான். பல பணக்காரர்கள் இதில் தெளிவாக இருப்பார்கள். பீச், பார்க்குகளில் உடற்பயிற்சி செய்யும் பணக்காரர்களைப் பார்த்திருப்பீர்கள். அவர்கள் தங்கள் தொப்பைக்காக மட்டும் ஓடவில்லை என்பதைப் புரிந்துகொள்ளுங்கள். கல்விக்கும், ஆரோக்கியத்திற்கும் செலவு செய்ய தயங்கவே கூடாது.

11. குடும்பமும் ஒரு கண்

ஒரு சமூகம் குடும்பத்திலிருந்துதான் தொடங்குகிறது. ஆகையால் எவ்வளவு பெரிய பணக்காரர் என்றாலும் பெரிய தொழில் என்றாலும் குடும்பத்திற்காகவும் நேரத்தை செலவிட வேண்டும். உயிர் வாழ்வாதற்கான ஆதார பலமே நம் அன்புக்குரியவர்களிடம் தான் இருக்கிறது. முன்னேறி செல்வதற்கு அவர்களுடைய அன்பும் ஊக்கமும் மகத்தான ஆற்றலை தரும். 
பணக்காரர்கள் தங்கள் குழந்தைகளைக் கண்டுகொள்வதில்லை என்பதும் பொய்யான கற்பனை. பல தந்தைகளின் சொத்துக்களையும் தொழில்களையும் அவர்களது பிள்ளைகள் தான் வழிநடத்துகிறார்கள் என்பதை மறுந்து விடாதீர்கள். 

80 ஆயிரம் வங்கிப் பணிகள்... எப்படித் தயாராவது?

இன்றைக்கு எல்லோரும் விரும்பும் ‘ஹாட் ஜாப்’பாக இருக்கிறது வங்கி வேலை. என்ஜினீயரிங் படித்த மாணவர்கள் முதல் அறிவியல் முதுகலைப் பட்டம் பெற்றவர்கள்  வரை வங்கி வேலைக்குத்தான் செல்ல வேண்டும் என்று விரும்பு கிறார்கள். இந்த நிலையில், அடுத்த சில ஆண்டுகளில் வங்கித் துறையில் 80,000 பணியாளர்கள் ஓய்வுபெறப் போகிறார்கள். இந்த பணியிடங்களுக்கு புதியவர்கள் நியமிக்கப்பட இருக்கிறார்கள். இந்த 80 ஆயிரம் பணியிடத்தில் உங்களுக்கான ஓர் இடத்தை உருவாக்கிக்கொள்ள என்ன செய்ய வேண்டும், வங்கி வேலை பெற என்ன செய்ய வேண்டும் என்பது குறித்து விளக்கமாக எடுத்துச் சொன்னார் கல்வி ஆலோசகர் வீரபாகு.

வங்கிகளின் முக்கியத்துவம்!

‘‘ஒரு நாடு பொருளாதாரத்தில் வளர்ச்சி அடைவதற்கு மிகவும் முக்கியப் பங்காக இருப்பது வங்கிகள்தான். அதாவது, அரசு வழங்கும் மானியம் முதல் வருமான வரி செலுத்துவதற்கான அத்தனை பணப் பரிவர்த்தனை சம்பந்தப்பட்ட வேலைகளும் வங்கிகள் மூலமாகத்தான் நடைபெறுகிறது. முன்பெல்லாம் மக்களிடம் இருக்கும் பணத்தை டெபாசிட் செய்யவும், தினசரி பயன்பாட்டுக்கு வெளியே எடுக்கவும் வங்கிகள் பயன்பட் டன. ஆனால், இன்று பணம் சார்ந்த அத்தனை பரிவர்த்தனைகளும் வங்கியின் மூலமாகவே நடக்கிறது. இதனால் வங்கியின் தொடர்பு இல்லாமல் எந்தவித மான வேலையும் நடக்காது  என்ற நிலை உருவாகி உள்ளது.

மேலும், நாட்டில் உள்ள முன்னணி வங்கிகள் அனைத்துமே தங்கள் கிளைகளை அனைத்து இடங்களிலும் தொடங்க வேண்டும் என்ற முனைப்புடன் உள்ளன. இதனால் புதிய வேலைவாய்ப்பு கள் இந்தத் துறையில் இருந்து கொண்டேதான் இருக்கும்.

புதிதாக உருவாகும் வங்கி வேலைக்குத் தேவையான பணியாளர்கள் போட்டித் தேர்வுகள் மூலமாகவே தேர்ந்தெடுக்கப்படுகிறார்கள். இந்தப் போட்டித் தேர்வுகள் எப்படி நடத்தப்படுகின்றன, என்னென்ன பிரிவுகளின் கீழ் தேர்வுகள் நடைபெறும், யார் இதில் கலந்துகொள்ள முடியும் என்கிற கேள்விக்கான பதிலை இனி பார்ப்போம்.

முக்கியப் பொதுத் துறை வங்கிகளில் இந்த நிதியாண்டில் மட்டும் 39,756 ஊழியர்கள் ஓய்வுபெற இருக்கிறார்கள். இதில் 19,065 அலுவலர்கள், 14,669 எழுத்தர் பணியில் உள்ளவர்கள். இவர்களின் பணிகளைத் தொடர்ந்து செய்வதற்குப் புதிய பணியாளர்களைத் தேர்வு செய் வதற்கான வேலைகள் நடந்து வருகின்றன.

பதவி!

வங்கியில் எழுத்தர் மற்றும் அலுவலர்கள் மற்றும் சிறப்பு அலுவலர்களுக்கான தேவை அதிகமாக உள்ளது. சிறப்பு அலுவலர்கள் என்பது கணினி பொறியாளர்கள், சட்ட ஆலோசகர், கணக்காளர் போன்ற பதவிகள் சிறப்பு அலுவலர் பதவிகள் ஆகும்.

வங்கியில் சட்ட ஆலோசனை என்பது கட்டாயம் தேவைப்படும். இதற்கு வெளியிலிருந்து தனியாக ஆலோசகர்கள் நியமிக்க முடியாது. இதேபோலதான் வங்கியில் உள்ள கணினிகளுக் கான வேலைகளைப் பார்ப் பதற்கு, வங்கியின் ஊழியர்களுக் கான சம்பளம், இதரச் செலவுகள் போன்றவற்றுக்கும், கணக்குகளைப் பராமரிப்பதற்கு தனியாக கணக்காளர்கள் போன்ற பணியிடங்கள் உருவாக்கப்பட்டு உள்ளது.

கல்வித் தகுதி, சம்பளம்!

குறைந்தபட்சம் இளநிலை பட்டம் முடித்தவர்கள் இந்தப் போட்டித் தேர்வினை எழுத முடியும். இன்ஸ்டிட்யூட் ஆஃப் பேங்கிங் பெர்சனல் செலக்‌ஷன் (ஐபிபிஎஸ்) என்ற அமைப்புதான் இதற்கான தேர்வுகளை நடத்துகிறது. எஸ்பிஐ தவிர்த்து, அனைத்துப் பொதுத்துறை வங்கிகளுக்கான தேர்வையும் இந்த அமைப்புதான் நடத்துகிறது (எஸ்பிஐ வங்கி தனியாகத் தேர்வு நடத்துகிறது).

இந்தத் தேர்வில் கட் ஆஃப் தேதி என்று கூறப்படும், அதாவது,  ஆகஸ்டு 1-ம் தேதியன்று தேர்வு எழுதுபவர்களுக்கு 20 வயது பூர்த்தியாகி இருக்க வேண்டும்; மேலும், தேர்வு எழுதுபவர் களுக்கான அதிகபட்ச வயது 28 ஆகும். ஓபிசி, எஸ்சி, எஸ்டி மற்றும் முன்னாள் ராணுவத்தினருக்கு வயது வரம்பில் சலுகை உள்ளது.

எழுத்தாளர் பதவிக்கு 25-30 ஆயிரம் ரூபாயும், அலுவலர் மற்றும் சிறப்பு அலுவலர் பதவிக்கு 40-45 ஆயிரம் ரூபாய் வரையும் சம்பளம் கிடைக்க வாய்ப்புள்ளது.

பாடத் திட்டங்கள்!

இந்தத் தேர்வு இரண்டு பிரிவுகளாக நடத்தப்படும். முதல்நிலை தேர்வு, இரண்டாம் நிலை தேர்வு என நடைபெறும். இவை இரண்டுமே ஆன்லைன் மூலமாக நடைபெறும் தேர்வுகள் ஆகும்.

முதல் நிலைத் தேர்வுக்கு ஒரு மணி நேரமும், இரண்டாம் நிலைத் தேர்வுக்கு இரண்டு மணி நேரமும் கால அவகாசம் வழங்கப்படும்.

முதல் நிலைத் தேர்வை பொறுத்தவரை, ஆங்கிலம், கணிதம், தீர்வு கண்டுபிடித்தல் ஆகியவற்றில் கேள்விகள் கேட்கப்படும். இதில் பள்ளியில் படித்த ஆங்கிலம் (இலக்கணம் உட்பட) மற்றும் கணிதப் பாடப் பிரிவுகளிலிருந்து கேள்விகள் இருக்கும்.

இரண்டாம் நிலைத் தேர்வில் ஆங்கிலம், கணிதம், தீர்வு கண்டுபிடித்தல் ஆகிய இவற்றோடு வங்கி சம்பந்தப்பட்ட பொது அறிவுக் கேள்விகளும் சமமாக இடம்பெறும். எனவே, பாடப் புத்தகத்தைப் படிப்பது டன் சமீபத்திய செய்திகள், பொதுவான விஷயங்கள் குறித்த அறிவும் அவசியம். வங்கி சார்ந்த கேள்விகளுக்கு தயார் செய்ய, நிதி சார்ந்த தினசரி செய்திகளைப் படிப்பது அவசியம்.

மதிப்பெண்!

முதல் நிலைத் தேர்வு 100 மதிப்பெண்ணுக்கும், இரண்டாம் நிலைத் தேர்வு 200 மதிப்பெண்ணுக்கும் நடத்தப்படும். இதில் ஒவ்வொரு பாடப்பிரிவுக்கும் தனித்தனியாக கட் ஆஃப் மதிப்பெண்கள் இருக்கும். எனவே, அனைத்துப் பிரிவுகளிலும் தேர்ச்சி பெறுவது அவசியம். அதுதவிர, மொத்த கட் ஆஃப் மதிப்பெண்களும் இருக்கும். இந்த மதிப்பெண்கள் ஒவ்வொரு தேர்வுக்கும் வித்தியாசப்படும். அதேவேளை யில் தவறாக விடையளிக்கும் கேள்விகளுக்கு எதிர்மறை மதிப்பெண்களும் உண்டு என்பதையும் நினைவில் கொள்ள வேண்டும்.

எப்படித் தயார் ஆவது?

வங்கி தேர்வில் வெற்றி பெற பயிற்சி வகுப்பில் சேர்ந்து படிப்பது கட்டாயம் என்று அவசியம் இல்லை. நீங்களே இந்தத் தேர்வுக்கு தனிப்பட்ட முறையில் எளிதாகத் தயாராக முடியும். தொடர்ந்து பயிற்சி செய்வது மூலமாக இதை எளிதாகச் செய்ய முடியும்.

இந்தத் தேர்வைப் பொறுத்த வரை, சரியான பதில் மட்டும் முக்கியம் இல்லை. கேள்விகளுக்கு எவ்வளவு வேகமாகப் பதில் அளிக்கிறீர்கள் என்பதும் இதில் மிகவும் முக்கியமானது.

மேலும், இந்தத் தேர்வு ஆன்லைன் தேர்வு என்பதால், ஆன்லைனில் தேர்வு எழுதிப் பழகுவதும் அவசியம்.

உங்களின் பொது அறிவை வளர்த்துக்கொள்ளும் அதே வேளையில், கணிதம் மற்றும் ஆங்கிலப் பாடப் பிரிவுகளில் பாடப் புத்தங்களில் இருப்பதை விடக் கொஞ்சம் அட்வான்ஸாகப் படித்து வைத்துக்கொள்வது முக்கியம். அப்போதுதான் தேர்வில் கேட்கப்படும் கேள்விகளுக்கு விரைவாகப் பதிலளிக்க முடியும். தொடர்ந்து பயிற்சி செய்துவந்தால் தேர்வு என்பது மிகவும் எளிமையானதாக இருக்கும்.

இப்போது பட்டப்படிப்பு படித்து முடித்தவர்கள் அடுத்து வங்கி வேலைக்கு படிக்கத் தொடங்கினால், வங்கி வேலை கிடைப்பது நிச்சயம்!

படம்:  சொ.பாலசுப்ரமணியன்

இரா.ரூபாவதி

நன்றி

விகடன்